Ադրբեջանի ԶՈՒ կողմից ԼՂՀ ԶՈՒ խոցված ուղղաթիռի մասերը կուղարկվեն փորձաքննության, նոյեմբերի 22-ին լրագրողների հետ զրույցում ասել է ՀՀ պաշտպանության նախարար Սեյրան Օհանյանը։
«Ադրբեջանի կոշտ դիրքորոշման, տրամաբանության եւ հումանիզմի սկզբունքներին հետեւելու բացակայության, ուղղաթիռը խոցելու գործողությունների եւ մարմիններին մոտենալը թույլ չտալու հետեւանքով ԼՂՀ պաշտպանության բանակը որոշել է դիմել հատուկ միջոցների։ ԼՂՀ բանակի մարտիկների պրոֆեսիոնալ գործողությունների շնորհիվ որոշվել է ուղղաթիռի անկման վայրը։ Հաջողվել է դուրս բերել զոհված երեք օդաչուներից մեկի դին եւ մյուս երկուսի մասունքները։ Համապատասխան հետաքննության համար դուրս են բերվել նաեւ ուղղաթիռի մասերը»,- հայտարարել է Սեյրան Օհանյանը։
Ըստ նրա՝ հակառակորդը փորձել է խոչընդոտել, սակայն նրանց պատրաստած թակարդն ամբողջությամբ չեզոքացվել է։
«Զոհված օդաչուների հարազատներին սփոփանքի խոսքեր ասելու հետ մեկտեղ հարկ է հպարտանալ մարտիկներով, որոնք պատվով կատարեցին իրենց առջեւ դրված բարդ առաջադրանքը»,- ընդգծել է նախարարը։
Հարցին՝ կլինեն արդյոք պատասխան քայլեր, Սեյրան Օհանյանը պատասխանել է, որ սադրանքները միշտ էլ պատասխան կստանան։ «Առաջնամասում կուժեղացվեն հակառակորդին հայտնաբերելու եւ ոչնչացնելու միջոցները։ Բայց այդ միջոցներն ուղղված կլինեն միայն նրանց դեմ, ովքեր կփորձեն խախտել սահմանները։ Հայ ժողովրդի մեջ ընդունված չէ կացնով թաքուն հարվածելն ու դավաճանելը։ Իսկ նրանց, ովքեր կփորձեն խաթարել խաղաղությունը, խիստ եւ արժանի պատասխան կտանք»,- եզրափակել է Սեյրան Օհանյանը։
