Լեռնային Ղարաբաղի ինքնապաշտպանության ուժերի առաջին հրամանատար, Ղարաբաղյան պատերազմի վետերանների միության նախագահ, գեներալ Արկադի Կարապետյանը (Ագո) կարծում է, որ խոցված ուղղաթիռի անձնակազմի աճյունները դուրս բերելու ՊԲ գործողություններն այնքան ճիշտ եւ այնքան պարզ են եղել, որ այլեւս մեկնաբանելու ոչինչ չի մնում։ NEWS.am-ի թղթակցի հետ զրույցում Արկադի Կարապետյանը նշեց, որ այժմ մնում է հասկանալ ժողովրդի տրամադրվածությունը հետագա քայլերի համար։
«Եթե ժողովուրդը պատրաստ է, գնանք, Բաքուն գրավենք, մենք՝ կռվածներս, ոչ մի խնդիր չունենք, ով որ իրոք կռվել է, պատրաստ է նորից կռվել, մնում է ժողովրդի տրամադրություները հասկանալ։ Ինչ վերաբերում է խոցված ուղղաթիռի դեպքին, ապա ԼՂՀ բանակի ղեկավարությունը շատ լավ գիտի՝ ինչպես պետք է պատասխանել, մեր կարծիքն այս դեպքում կարեւոր չէ, իրենք իրենց անելիքը շատ լավ գիտեն»,-ասաց նա։
Ավելի վաղ NEWS.am-ը հաղորդել էր, որ հայկական ուժերի հատուկ գործողության արդյունքում դեպքի վայրից տարհանվել են ուղղաթիռի անձնակազմից մեկի դին, երկու օդաչուների մասունքները և ուղղաթիռի որոշ անհրաժեշտ մասեր։
Նշենք, որ խոցված ուղղաթիռի զոհված երեք օդաչուներն են ուղղաթիռի հրամանատար մայոր Սերգեյ Սահակյանը, երկու զինծառայողներ, լեյտենանտ Ազատ Սահակյանը եւ ավագ լեյտենանտ Սարգիս Նազարյանը:
Հիշեցնենք, որ ԼՂՀ ՊՆ-ի փոխանցմամբ՝ ղարաբաղա-ադրբեջանական սահմանի արեւելյան հատվածի օդային տարածքում նոյեմբերի 12-ին, ժամը 13.45-ի սահմաններում ուսումնավարժական թռիչքի ժամանակ ադրբեջանական ԶՈւ-ի կողմից հրադադարի ռեժիմի խախտման արդյունքում խոցվել է ԼՂՀ ՌՕՈւ «Մի-24» ուղղաթիռը: Խոցման վայրը շփման գծին չափազանց մոտ էր: Հակառակորդը շարունակում էր տարբեր տրամաչափի հրաձգային զենքերից ինտենսիվ կրակ վարել դեպքի վայրի ուղղությամբ՝ թույլ չտալով մոտենալ ուղղաթիռի անկման վայրին:
