Առաջին հերթին մենք պետք է ապավինենք մեր միակ դաշնակցին՝մեր ազգային զինված ուժերին։ Այս մասին այսօր՝ նոյեմբերի 22-ին, իր ֆեյսբուքյան էջում գրել է ԱԺ Ժառանգություն խմբակցության պատգամավոր Զարուհի Փոստանջյանը՝ անդրադառնալով նոյեմբերի 12-ին ադրբեջանական զինուժի կողմից խոցված հայկական ուղղաթիռի անձնակազմի մարմինները տարհանելու հատուկ գործողությանը։
«Հայկական զինված ուժերը կրկին ապացուցեցին մեր սիրելի զորավարի խոսքերը. «Ազատության գործը շատ դժվարին գործ մը դարձած է, մեծ ուժի կկարոտի, ազգովի քով քովի գանք և այդ մեծ ուժը կազմենք, քաջությունը, դրամը, զենքը չէ, որ կպակասին մեզի, այլ՝ կամքը, զորացնենք մեր կամքը և վստահ ըլլանք, որ կփրկվինք»,- գրել է Զարուհի Փոստանջյանը՝ մեջբերելով զորավար Անդրանիկի խոսքերը:
Ավելի վաղ NEWS.am-ը հաղորդել էր, որ մարտական խնդրի կատարման արդյունքում դեպքի վայրից տարհանվել են հայկական խոցված ուղղաթիռի անձնակազմից մեկի դին, երկու օդաչուների մասունքները և ուղղաթիռի որոշ անհրաժեշտ մասեր։
Նշենք, որ խոցված ուղղաթիռի զոհված երեք օդաչուներն են ուղղաթիռի հրամանատար մայոր Սերգեյ Սահակյանը, երկու զինծառայողներ, լեյտենանտ Ազատ Սահակյանը եւ ավագ լեյտենանտ Սարգիս Նազարյանը:
Հիշեցնենք, որ ԼՂՀ ՊՆ-ի փոխանցմամբ՝ ղարաբաղա-ադրբեջանական սահմանի արեւելյան հատվածի օդային տարածքում նոյեմբերի 12-ին, ժամը 13.45-ի սահմաններում ուսումնավարժական թռիչքի ժամանակ ադրբեջանական ԶՈւ-ի կողմից հրադադարի ռեժիմի խախտման արդյունքում խոցվել է ԼՂՀ ՌՕՈւ «Մի-24» ուղղաթիռը: Խոցման վայրը շփման գծին չափազանց մոտ էր: Հակառակորդը շարունակում էր տարբեր տրամաչափի հրաձգային զենքերից ինտենսիվ կրակ բացել դեպքի վայրի ուղղությամբ՝ թույլ չտալով մոտենալ ուղղաթիռի անկման վայրին:
