Իրանը ցանկանում է ձգձգել միջազգային միջնորդների վեցնյակի հետմիջուկային բանակցությունները եւս 6-12 ամսով, եթե նոյեմբերի 23-ի բանակցությունները կողմերի համաձայնությամբ չավարտվեն, հաղորդում է «ՌԻԱ Նովոստին»՝ վկայակոչելով Վիեննայում իրանական պատվիրակության ներկայացուցչին:
«Մենք հույս ունենք համաձայնության հասնել այսօր երեկոյան, բայց եթե պայմանավորվածության չհանգենք, մտածում ենք ձգել Ժնեւում ժամանակավոր համաձայնությունը: Դա կարող է լինել կես տարուց մինչեւ մեկ տարի ժամկետով,- ասել է իրանական պատվիրակության անդամը:
Իրանական ատոմային ծրագրի շուրջ բանակցությունների եզրափակիչ փուլը սկսվել է Վիեննայում, նոյեմբերի 18-ին: Նոյեմբերի 22-ի դրությամբ, կողմերը դեռ շոշափելի առաջընթացի չէին հասել: Նախորդ հանդիպումը կայացել էր Օմանում, նոյեմբերի 11-ին: