Պետք է ոչինչ չասել, ուղղակի հպարտանալ եւ ծափահարել, դա հրաշք չէ, դա իրողություն է: Այս մասին NEWS.am-ի թղթակցի հետ զրույցում ասաց գեներալ-մայոր Արկադի Տեր-Թադեւոսյանը՝ Կոմանդոսը:
Նա նշեց, որ այս պատասխանը ցավոք դաս չի լինի Ադրբեջանի համար, որն էլի ոտնձգություններ կանի մեր զինված ուժերի նկատմամբ: «Լավ կլիներ, որ մենք մի անգամ էլ պատասխան տայինք, չսպասեինք իրենց, իրենք միշտ խախտում են հրադադարը, դիվերսիոն խմբեր են ուղարկում, այնպես որ պետք է մի անգամ էլ նրանց հարված հասցրել»,-ասաց նա:
Կոմանդոսը շեշտեց, որ մի վայրկյան չի կասկածել, որ խոցված ուղղաթիռի անձնակազմին հայկական կողմը հետ կբերի: Նա շեշտեց, որ Ադրբեջանում ազգային, կրոնական հակասություններ կան, մի խավը մյուսին չի հասկանում, ինչը ազդում է բանակի բրա:
Ավելի վաղ NEWS.am-ը հաղորդել էր, որ հաշվի առնելով Ադրբեջանի կողմից ինչ-որ մեկին ուղղաթիռին մոտ թողնելու կտրուկ մերժումները, ԼՂՀ ՊԲ հրամանատարությունը մարտական խնդրի կատարման արդյունքում դեպքի վայրից տարհանել է ուղղաթիռի անձնակազմից մեկի դին, երկու օդաչուների մասունքները եւ ուղղաթիռի որոշ անհրաժեշտ մասեր։ Ադրբեջանական կողմը լուրջ կորուստներ է ունեցել, տարհանման գործողության արդյուքնում հայկական կողմից ոչ ոք չի տուժել:
Հիշեցնենք, որ ԼՂՀ ՊՆ-ի փոխանցմամբ՝ ղարաբաղա-ադրբեջանական սահմանի արեւելյան հատվածի օդային տարածքում նոյեմբերի 12-ին, ժամը 13.45-ի սահմաններում ուսումնավարժական թռիչքի ժամանակ ադրբեջանական ԶՈւ-ի կողմից հրադադարի ռեժիմի խախտման արդյունքում խոցվել էր ԼՂՀ ՌՕՈւ «Մի-24» ուղղաթիռը: Խոցված ուղղաթիռի զոհված երեք օդաչուներն են ուղղաթիռի հրամանատար մայոր Սերգեյ Սահակյանը, երկու զինծառայողներ, լեյտենանտ Ազատ Սահակյանը եւ ավագ լեյտենանտ Սարգիս Նազարյանը:
