«Ո´չ Թուրքիայում հանգստին». այս կոչով մի խումբ երիտասարդներ առաջիկա մեկ ամսում կայցելեն 50 տուրիստական գործակալություններ՝ վերջիններիս աշխատակիցներին կոչ անելով նվազագույնի հասցնել դեպի Թուրքիայի Հանրապետություն հանգստի եւ ժամանցի նպատակով տրամադրվող փաթեթների վաճառքը:
Հայաստանի երիտասարդական հիմնադրամի հասարակայնության հետ կապերի ծառայությունից հայտնում են, թե նախաձեռնությունը «Ոչ պետական բուհերի ուսանողական կենտրոն» ՀԿ-ինն է, որը ՀՀ նախագահի գործընկեր կազմակերպության՝ Հայաստանի երիտասարդական հիմնադրամի հայտարարած դրամաշնորհային մրցույթի շրջանակներում Երեւանում եւ մարզերում իրականացնում է «Բարձրաձայնում» ծրագիրը։
Ծրագրի շրջանակներում կանցկացվեն նաեւ դասախոսություններ. շուրջ 160 ուսանողներ կստանան պատմաբանի եւ մշակութաբանի կողմից մշակված եւ խտացված գիտելիքներ` Հայոց ցեղասպանության վերաբերյալ:
Նոյեմբերի 22-ին առաջին հանդիպումը հուշարձանագետ, պատմաբան, Հայկական ճարտարապետությունն ուսումնասիրող հիմնադրամի երեւանյան գրասենյակի ղեկավար Սամվել Կարապետյանի հետ էր։ Հուշարձանագետն ուսանողներին ծանոթացրեց Ցեղասպանությունից ի վեր Արեւմտյան Հայաստանի տարածքում նյութական մշակույթի, հուշարձանների վիճակի հետ։ Պարոն Կարապետյանը տեղեկացրեց, որ Արեւմտյան Հայաստանի մոտ 1400 բնակավայրերում կատարված ուսումնասիրություններից պարզել են, որ անցած տասնամյակների ընթացքում Թուրքիայի իշխանություններն իրականացրել են երբեմնի տանտիրոջ մշակութային ժառանգության, հողի իրական պատկանելությունը մատնող նյութական մշակույթի հետքերը վերացնելու ծրագրված քաղաքականություն։
Սամվել Կարապետյանը նշում է, որ մարդկային եղեռնին հաջորդել է մշակութային եղեռնը։ Հուշարձանները հատկապես շատ են ոչնչացվել 1940-ական թվականներին, 1960-ականների սկզբին։ 1965-ին, երբ Հայաստանում բարձրաձայնում էին Ցեղասպանության միջազգային ճանաչման եւ պահանջատիրության խնդիրը, Թուրքիան աննախադեպ ջարդարարության ալիք է բարձրացնում բանակի ուժի գործադրմամբ։ Հիմնականում ոչնչացրել են ակնհայտ քրիստոնեական հուշարձանները, հայկական գերեզմանոցները։ Խաչքարերը յուրացվել են որպես շինանյութ։ Որոշակիորեն պահպանվել են նախաքրիստոնեական հուշարձանները, որոնք էլ յուրացնելու, իրենց վերագրելու փորձեր են կատարում։
«Բարձրաձայնում» ծրագրի շրջանակներում երիտասարդները «Ո´չ Թուրքիայում հանգստին» վերտառությամբ կպչուն ժապավեններ կփակցնեն տուրիստական գործակալություններում, բուհերում, մարդաշատ վայրերում։
