ԼՂՀ ԶՈՒ խոցված ուղղաթիռի անձնակազմի մասունքների տարհանման գործողությունը փայլուն էր: Այս մասին նոյեմբերի 24-ի մամուլի ասուլիսում հայտարարել է վերլուծական «Մոդուս Վիիվենդի» կենտրոնի ղեկավար Արա Պապյանը:

Ըստ վերլուծաբանի՝ դա անհրաժեշտ քայլ էր:  «Ես լայնածավալ պատերազմ չեմ կանխատեսում, քանի որ Ադրբեջանը Հայաստանի ռազմական ոչնչացման խնդիր չունի, այլ վաղուց իրականացնում է մեր երկիրը հյուծելու քաղաքականություն», - նշել է Պապյանը: Ըստ նրա՝ Ադրբեջանը միշտ էլ առաջինն է եղել հիմնախնդիրը խորացնելու հարցում: «Ադրբեջանում տարբեր էթնիկ խմբեր կան, որոնք ճնշված են: Անհրաժեշտ է աշխատել էթնիկ եւ կրոնական փոքրամասնությունների հետ: Հայաստանը տարածաշրջանային առաքելություն ունի՝ աջակցել բոլոր ճնշված ազգային փոքրամասնություններին», - հավելել է Արա Պապյանը:

Հիշեցնենք, նոյեմբերի 12-ին Ադրբեջանի ԶՈՒ-ն խոցել էր ԼՂՀ ԶՈՒ ուսումնավարժական թռիչք իրականացնող Մի-24 ուղղաթիռը։  Երեք օդաչուները զոհվել էին։ NEWS.am-ն ԼՂՀ պաշտպանության բանակից հայտնել էին, որ ՊԲ  մարտիկների մարտական առաջադրանքի կատարման արդյունքում դեպքի վայրից դուրս են բերվել ուղղաթիռի անձնակազմի  մասունքները եւ ուղղաթիռի անհրաժեշտ մասերը։ Գործողության ընթացքում ոչնչացվել է ադրբեջանցի երկու զինվոր։ ԼՂՀ բանակը կորուստներ չի ունեցել։