Ադրբեջանական զինված ուժերի կողմից խոցված հայկական ուղղաթիռի անձնակազմի անդամների ընտանիքներին կտրվի ոչ միայն միանվագ օգնություն, այլեւ կնշանակվի կենսաթոշակ: Այս մասին NEWS.am-ի թղթակցին հայտնեցին ՊՆ զինծառայողների սոցիալական պաշտպանության վարչությունից:
Այսպես, միանվագ օգնությունը կազմում է հուղարկավորության համար նախատեսված 700 հազար դրամն է եւ ապահովագրական գումարը՝ մոտ 900 հազար դրամ: Ինչ վերաբերում է զինվորական կենսաթոշակ նշանակելուն, ապա ՊՆ-ն ամեն ինչ անելու է մինչեւ դեկտեմբերի 15-ը դրա հետ կապված հարցերը լուծելու համար:
Ուղղաթիռի հրամանատար, մայոր 38-ամյա Սերգեյ Սահակյանը երեք որդի ունի, մի երեխային տրամադրվող կենսաթոշակը կազմում է 90 հազար դրամ, դրան գումարվում է նաեւ 30 հազար դրամի չափով պարգեւավճարը եւ ստացվում է, որ Սահակյանի ընտանիքը ամսական կստանա մոտ 300 հազար կենսաթոշակ: Մյուս երկու զինծառայողները ամուսնացած չէին, ապրում էին ծնողների հետ: Այս դեպքում, ինչպես մեզ փոխանցեցին ՊՆ-ից, նախ պետք է ճշտվի նրանց ծնողների կենսաթոշակային տարիքում լինել, չլինելու հանգամանքը, արդյոք հաշմանդամության կարգ ունեն, թե ոչ: Եթե այս հանգամանքներից մեկնումեկը լինի, ապա սոցիալական ապահովության պետական ծառայության տարածքային կառույցների կողմից կնշանակվի կենսաթոշակ 30 հազարի չափով: Անկախ այդ հանգամանքից՝ այս զինծառայողների ընտանիքներին ՊՆ-ն որպես պարգեւավճար կտրամադրի 30 հազար դրամ:
Ի դեպ, երեք զինծառայողներն էլ ավարտել են Ավիացիոն ինստիտուտը եւ ավիացիոն զորամասի սպաներ են:
Ավելի վաղ NEWS.am-ը հաղորդել էր, որ հաշվի առնելով Ադրբեջանի կողմից ինչ-որ մեկին ուղղաթիռին մոտ թողնելու կտրուկ մերժումները, ԼՂՀ ՊԲ հրամանատարությունը մարտական խնդրի կատարման արդյունքում դեպքի վայրից տարհանել է ուղղաթիռի անձնակազմից մեկի դին, երկու օդաչուների մասունքները եւ ուղղաթիռի որոշ անհրաժեշտ մասեր։ Ադրբեջանական կողմը լուրջ կորուստներ է ունեցել, տարհանման գործողության արդյուքնում հայկական կողմից ոչ ոք չի տուժել:
Հիշեցնենք, որ ԼՂՀ ՊՆ-ի փոխանցմամբ՝ ղարաբաղա-ադրբեջանական սահմանի արեւելյան հատվածի օդային տարածքում նոյեմբերի 12-ին, ժամը 13.45-ի սահմաններում ուսումնավարժական թռիչքի ժամանակ ադրբեջանական ԶՈւ-ի կողմից հրադադարի ռեժիմի խախտման արդյունքում խոցվել էր ԼՂՀ ՌՕՈւ «Մի-24» ուղղաթիռը: Խոցված ուղղաթիռի զոհված երեք օդաչուներն են ուղղաթիռի հրամանատար մայոր Սերգեյ Սահակյանը, երկու զինծառայողներ, լեյտենանտ Ազատ Սահակյանը եւ ավագ լեյտենանտ Սարգիս Նազարյանը:
