Գյումրիի պետական մանկավարժական ինստիտուտի ռեկտորի եղբոր՝ Հարություն Գրիգորյանի սպանության մեջ մեղադրվող Արման Կատունյանի գործով նախաքննությունը շարունակվում է: Այս մասին NEWS.am-ին ասաց նրա փաստաբան Երվանդ Վարոսյանը:

Նրա խոսքով՝ նշանակված փորձաքննությունների զգալի մասի եզրակացությունը դեռ չեն ստացվել: Մեր հարցին, թե հնարավոր է նախաքննական մարմինը եզրակացությունները ստանալուց հետո փոխի առաջադրված մեղադրանքը, Երվանդ Վարոսյանը պատասխանեց. «Չեմ կարող ասել: Ինչ վերաբերվում է իմ պաշտպանյալին, ապա նա իր դիրքորոշումն առաջադրված մեղադրանքի վերաբերյալ հայտնել է եւ որեւէ բան այս ընթացքում չի փոխվել»:

Նշենք, որ Կատունյանը ՊՆ Շիրակի մարզի Ռազմական ոստիկանության քրեական հետախուզության բաժնի պետն էր։ Ըստ Գյումրիում տարածված տեղեկությունների՝ սպանության դրդապատճառը խանդն է։ Կատունյանի խոսքով՝ ռեկտորի եղբայրը երկար ժամանակ սիրահետել է իր կնոջը։ Նրան մեղադրանք է առաջադրվել ՀՀ ՔՕ 104 հոդվածի 1-ին եւ 235 հոդվածի 1-ին մասերով (ապօրինաբար, դիտավորությամբ մեկ ուրիշին կյանքից զրկելը եւ ապօրինի զենք կրելը): Արման Կատունյանը կալանավորված է եւ գտնվում է «Վարդաշեն» քրեակատարողական հիմնարկում:

Ավելի վաղ NEWS.am-ը հայտնել էր, որ Շիրակի մարզում hուլիսի 24-ին ժամը 16:00-ի սահմանում, Գետք համայնքի չօգտագործվող ֆերմաներից մեկի տարածքում գտել էին Գյումրիի պետական Մանկավարժական ինստիտուտի ռեկտոր Վարդեւան Գրիգորյանի եղբոր՝ Հարություն Գրիգորյանի դին՝ հրազենային տարբեր վնասվածքով։