Սուխումում Աբխազիայի եւ Ռուսաստանի միջեւ պայմանագրի ստորագրմանն ընդառաջ երկու հանրահավաքներ են կայացել, փոխանցում է «ՌԻԱ Նովոստին»:
Ըստ աղբյուրի՝ պայմանագիրը նախատեսում են ստորագրել Սոչիում ՌԴ նախագահ Վլադիմիր Պուտինի եւ Աբխազիայի ղեկավար Ռաուլ Հաջիմբայի հանդիպման ժամանակ:
Սուխումում հանրահավաքները տեղի են ունեցել միեւնույն ժամանակ, սակայն տարբեր թաղամասերում: Ցույցի մասնակիցները կանգնած են եղել Ռուսաստանի եւ Աբխազիայի դրոշներով:
Հաջիմբայի կողմնակիցներն իրենց ցույցն անցկացրել են կառավարական շենքերի համալիրից մի քանի կմ հեռավորության վրա: Միջոցառմանը ելույթ են ունեցել փոխնախագահ Վիտալի Գաբնիան, փոխխոսնակ Դաուր Արշբան եւ այլք: Քաղաքի կենտրոնում մեկ այլ հանրահավաք է կազմակերպել ընդդիմադիր «Ամցախարա» կուսակցությունը: Այս հանրահավաքի մասնակիցները նույնպես կողմ են եղել ՌԴ-ի եւ Աբխազիայի միջեւ ռազմավարական գործընկերության ամրապնդմանը եւ զարգացմանը, սակայն նրանց ձեռք չի տալիս պայմանագրի տեքստը. ըստ նրանց՝ փաստաթուղթը վերանայման կարիք ունի՝ պաշտպանության, տնտեսական քաղաքականության եւ ներքին քաղաքականության հարցերի տեսանկյունից: