Երեւանի քննչական վարչության Կենտրոն եւ Նորք-Մարաշ վարչական շրջանների քննչական բաժնում շարունակվում է կոշիկի խանութից «Սամսունգ գալաքսի» բջջային հեռախոս գողանալու դեպքի առթիվ հարուցված քրեական գործի նախաքննությունը։
ՀՀ քննչական կոմիտեի տեղեկատվության եւ հասարակայնության հետ կապերի բաժնից հայտնում են, թե դեպքը տեղի է ունեցել 2014թ. հոկտեմբերին 17-ին` ժամը 16:30-ի սահմաններում, Երեւան քաղաքի Տիգրան Մեծի պողոտայում գործող «Ունե Հաուս» կոշիկի խանութում, որտեղ գաղտնի հափշտակվել է բնակչուհի Լ. Բադալյանին պատկանող բջջային հեռախոսը` վերջինիս պատճառելով 330.000 ՀՀ դրամի գույքային վնաս:
Նախաքննության ընթացքում ստացվել է Երեւան քաղաքի Տիգրան Մեծի պողոտայում գործող «Ունե Հաուս» կոշիկի խանութի անվտանգության տեսախցիկների տեսագրությունները, որտեղ երեւում է, թե ինչպես է շիկահեր, կարճ սանրվածքով կինը հեռախոսը դնում իր պայուսակը եւ, դրամարկղում վճարելով գնված կոշիկի համար, շտապ հեռանում:
Ովքեր ճանաչում են կամ որեւէ տեղեկություն ունեն լուսանկարում պատկերված շիկահեր, կարճ սանրվածքով կնոջ ինքնության կամ գտնվելու վայրի մասին, խնդրում են հայտնել ՀՀ քննչական կոմիտեի Երեւան քաղաքի Կենտրոն եւ Նորք-Մարաշ վարչական շրջանների քննչական բաժին կամ դիմել ոստիկանության մոտակա բաժին: