Անձամբ մեր զորամասի անունից տղերքին խոսք ենք տալիս, որ իրենց փայ երկնակամարին տեր ենք կանգնելու։ Այս մասին այսօր՝ նոյեմբերի 24-ին, ադրբեջանական զինված ուժերի կողմից խոցված հայկական ուղղաթիռի զոհված անձնակազմի հոգեհանգստի արարողության ժամանակ մի քանի լրագրողների հետ զրույցում ասաց Տրանսպորտային մարտական ուղղաթիռային էսկադրիլիայի ղեկապետ, մայոր Գոռ Ղազարյանը։
«Թող Հեյդարի թոռնիկներն էլ իմանան, որ արծիվները լեռներում են ծնվում ու հատուցումն էլ այն բաժինն է, որ իրենք ստանալու են շատ սառը ու ժամանակին։ Ուժ բոլորիս, համբերություն, սա այն պատերազմն է, այն հակամատությունն է, ժողովուրդ, որ պսակվելու է միայն եւ միայն մեր հաղթանակով»,- ասաց նա։
Մայոր Ղազարյանը ճանաչել է տղաներին, նշեց, որ շատ ծանր է իր համար նրանց մասին խոսելը։
«Օդաչուներին ճանաչել եմ։ Սերգեյ Սահակյանի հետ ծառայել եմ 19 տարի։ Կիսել ենք մեր ծառայության բոլոր դժվարություններն ու ուրախությունները։ Շատ ծանր է խոսել Սարգիսի ու Ազատի մասին, երկուսն էլ երիտասարդ, կարգապահ, բանիմաց ծառայողներ էին»,- ասաց Գոռ Ղազարյանը։
Նրա խոսքով՝ ուրիշ սպասելիք չկար Սաֆարովի նման ստահակներ հերոսացնող պետությունից. «Նրանք իրենց դեմքը մի անգամ չէ, որ ցույց են տվել»։
Հիշեցնենք, որ ԼՂՀ ՊՆ-ի փոխանցմամբ՝ ղարաբաղա-ադրբեջանական սահմանի արեւելյան հատվածի օդային տարածքում նոյեմբերի 12-ին, ժամը 13.45-ի սահմանում ուսումնավարժական թռիչքի ժամանակ ադրբեջանական ԶՈւ-ի կողմից հրադադարի ռեժիմի խախտման արդյունքում խոցվել էր ԼՂՀ ՌՕՈւ «Մի-24» ուղղաթիռը: Խոցման վայրը շփման գծին չափազանց մոտ էր: Հակառակորդը շարունակում էր տարբեր տրամաչափի հրաձգային զենքերից ինտենսիվ կրակ վարել դեպքի վայրի ուղղությամբ՝ թույլ չտալով մոտենալ ուղղաթիռի անկման վայրին: Ուղղաթիռի խոցումից տասն օր անց՝ նոյեմբերի 22-ին, ԼՂՀ զինված ուժերը հատուկ գործողություն իրականացրին, որի արդյունքում դուրս բերեցին եւ ընտանիքներին հանձնեցին Ազատ Սահակյանի դին, Սերգեյ Սահակյանի եւ Սարգիս Նազարյանի մասունքները։