Մոսկվայում տնային կալանքի տակ գտնվող Լեւոն Հայրապետյանի առողջական վիճակի զննումն ամբողջական չի եղել: Այս մասին Հայաստանում մարդու իրավունքների պաշտպան Կարեն Անդրեասյանին հայտնել է Ռուսաստանի Դաշնության օմբուդսմեն Էլլա Պամֆիլովան:
«Մենք հարցում էինք ուղարկել ՌԴ օմբուդսմենին՝ պարզելու Լեւոն Հայրապետյանի կալանքի տակ պահելու հիմքերը՝ հաշվի առնելով նրա առողջական վիճակը: Էլլա Պամֆիլովան պատասխանել է, որ իր ներկայացուցիչները տեսակցել են Լեւոն Հայրապետյանին, պարզվել է, որ նրա առողջական վիճակի զննումն ամբողջական չի եղել, եւ ՌԴ մարդու իրավունքների հանձնակատարի միջնորդությամբ կազմվել է լրացուցիչ գրաֆիկ՝ Հայրապետյանի բժշկի հետ հանդիպելու: Դրանից հետո արդեն հոկտեմբերի 3-ին Բասմանի քաղաքային դատարանը փոխեց խափանման միջոցը: Կարելի է ասել, որ այսպիսով մեր առջեւ դրված խնդիրը լոծվեց»,- NEWS.am-ի թղթակցի հետ զրույցում ասաց ՄԻՊ խորհրդական Երանուհի Թումանյանցը:
Նրա խոսքով՝ եթե ընթացքում նորից խնդիրներ առաջանան, կդիմեն ՌԴ-ի իրենց գործընկերներին:
Նշենք, որ դեռ օգոստոսին Երեւանում տեղի ունեցած բողոքի ակցիայի ժամանակ գործարարին սատարողները Կարեն Անդրեասյանից պահանջել էին հետաքրքրվել Լեւոն Հայրապետյանի առողջական վիճակով եւ հարցին լուծում տալ: