ՀՀ-ում ԱՄՆ-ի արտակարգ եւ լիազոր դեսպան Ջոն Հեֆերնը կարծում է, որ Ռուսաստանը գիտի՝ ինչ է հարկավոր անել Արեւմուտքի պատժամիջոցները կանգնեցնելու համար:
«Արեւմուտքի պատժամիջոցներն ուղղված չեն Հայաստանի դեմ, սակայն ես հասկանում եմ, որ Ռուսաստանի եւ Հայաստանի տնտեսությունները փոխկապակցված են», - հայտարարել է դեսպանը՝ պատասխանելով հարցին՝ կազդեն արդյոք Հայաստանի վրա Ռուսաստանի դեմ կիրառվող արեւմտյան պատժամիջոցները:
Ըստ նրա՝ տնտեսության բազմազանեցումը եւ հնարավորությունների ստեղծումը եւս մեկ պատճառ է Արեւմուտքի հետ գործընկերության համար: Պատասխանելով հարցին՝ ինչպես Իրանի հետ բանակցությունները կազդեն Հայաստանի եւ ԱՄՆ-ի հարաբերությունների վրա՝ դեսպանը հայտարարել է, որ Իրանի հետ գործարք կնքելը լավ կլինի բոլորի համար:
Իր հերթին ՀՀ-ում Մեծ Բրիտանիայի արտակարգ եւ լիազոր դեսպան Քեթրին Լիչը նշել է, որ ռուբլու թուլացումը կանդրադառնա աշխատանքային միգրանտների վրա: «Ընդհանուր առմամբ, արգելքների կառուցումը, այլ ոչ թե վերացումը վատ է բոլորիս համար», - ամփոփել է նա: