Հայաստանի եւ Թուրքիայի միջեւ հարաբերությունների կարգավորումը կարեւոր է ամբողջ տարածաշրջանի համար: Այս մասին Twitter-կոնֆերանսում նոյեմբերի 25-ին հայտարարել է ՀՀ-ում Մեծ Բրիտանիայի արտակարգ եւ լիազոր դեսպան Քեթրին Լիչը՝ պատասխանելով հարցին, թե արդյոք պետք է նոր զարգացումների սպասել Հայոց ցեղասպանության 100-րդ տարելիցին ընդառաջ:
«Մեծ Բրիտանիան աջակցում է շփումներին, մեդիա-նախագծերին եւ հաջորդ տարի ավելիի հույս ունի», - ասել է դիվանագետը:
ՀՀ-ում ԱՄՆ-ի արտակարգ եւ լիազոր դեսպան Ջոն Հեֆերնի խոսքով էլ՝ իր երկիրը բոլոր մակարդակներում առաջ է տանում հաշտեցումը, ինչպես նաեւ կառավարությունների, հասարակ մարդկանց եւ գործարարների հետ կապեր է պաշտպանում: ԱՄՆ-ն նաեւ կոչ է անում վավերացնել Հայաստանի եւ Թուրքիայի միջեւ արձանագրությունները:
Ինչ վերաբերում է ԵՄ-ին, ըստ Տրայան Հրիսթեայի, ԵՄ-ն աջակցում է Հայաստանի եւ Թուրքիայի հարաբերությունների կարգավորմանը՝ առանց նախապայմանների: