Եթե Աբխազիան բանակցություններին մասնակցի որպես լիիրավ կողմ, նշանակում է՝ Վրաստանի եւ Ռուսաստանի միջեւ երկաթուղային հաղորդակցությունը չի վերականգնվի: Այս մասին NEWS.am-ի թղթակցի հետ զրույցում հայտարարեց Վրաստանի վերաինտեգրման հարցերի նախարար Պաատա Զաքարեիշվիլին:
Նրա խոսքով, Վրաստանը վրաց-ռուսական երկաթուղային հաղորդակցության աբխազական հատվածի վերականգնման հետ կապված ոչ մի խնդիր չունի: «Բայց դա պետք է բացառապես տնտեսական նախագիծ լինի: Այնտեղ, որտեղ Աբխազիան հիշատակվում է որպես բանակցային գործընթացի կողմ, արդեն քաղաքական հարց է: Իսկ մենք դեմ ենք քաղաքականությանը: Մենք ցանկանում ենք, որպեսզի երկաթուղու հարցը քննարկվի Ռուսաստանի եւ Վրաստանի միջեւ»,- նշեց Զաքարեիշվիլին՝ եւս մեկ անգամ ընդգծելով, որ պայմանագիրը պետք է ստորագրվի Ռուսաստանի եւ Վրաստանի միջեւ:
Ավելի վաղ ՌԻԱ Նովոստին հաղորդել էր, որ Ռուսաստանի նախագահ Վլադիմիր Պուտինը Սոչիում Աբխազիայի ղեկավարի հետ բանակցություններից հետո հայտարարել էր. «Հնարավոր ենք համարում այլ գործընկերների հետ մտածել եւ, ընդհանուր համաձայնության դեպքում, իրականացնել այնպիսի նախագիծ, ինչպիսին է, օրինակ, Սուխում-Թբիլիսի ուղղությամբ տարանցիկ երկաթուղային հաղորդակցությունը»: Դա, իր հերթին, հնարավորություն կընձեռի վերականգնել Հայաստանի եւ Ռուսաստանի միջեւ երկաթուղային հաղորդակցությունը: