Հայկական դրամի անկումը չի խանգարի արտաքին պարտքի վճարմանը: Այդ մասին այսօր՝ նոյեմբերի 25-ին հայտարարեց ֆինանսների փոխնախարար Պավել Սաֆարյանը՝ պատախանելով NEWS.am-ի թղթակցի հարցին: Նա նշեց, որ գործող օրենսդրությամբ՝ բյուջեի ծախսերում եւ եկամուտներում օտարերկրյա արժույթը դրամի փոխարկվում է բյուջեում նշված փոխարժեքով: Այնտեղ ներկայացված է այս ամսվա 1-ի դրությամբ փոխարժեքը:
«2015թ. բյուջեի նախագիծը մենք կներկայացնենք դեկտեմբերի սկզբին՝ խորհրդարանի լիագումար նիստին: Հետեւապես, բյուջեում, մենք դոլարի նկատմամբ դրամի փոխարժեքը կներկայացնենք նոյեմբերի 1-ր դրությամբ (411,2՝ խմբ)», - հստակեցրեց Սաֆարյանը: Հենց այս փոխարժեքով էլ կիրականցվի բյուջեի համար ողջ փոխարկումը՝ եւ եկամտային (միջազգային վարկեր) եւ ծախսային (պետական պարտքի սպասարկում): Ֆիքսված փոխարժեքի եւ փոխարկման պահին փոխարժեքների միջեւ տարբերության արժութային ռիսկերը կրում է Կենտրոնական բանկը:
Նկատենք, որ առաջին դեպքում (մուտքերի) ԿԲ-ն կշահի. Դրամային արտահայտությամբ միջազգային վարկերից ստացվող մուտքերը կավելանան: Սակայն երկրորդ դեպքում (պետական պարտքի) քիչ շահավետ փոխարժեքով ստիպված կլինեն փոխարկել:
Հիշեցնենք, որ դոլարի փոխարժեքը նոյեմբերի 24-ին կազմել է 435 դրամ: Մեկ օրվա ընթացքում այն միանգամից բարձրացել է 16 դրամով: Սա 2009թ. մարտի դրամի թռիչքաձեւ անկման ժամանակներից չտեսնված ցատկ է: Այսօր փոխարժեքը մի փոքր նվազել է՝ 433.68 դրամ: Այսպիսով, դոլարի ներկայիս եւ բյուջեում ներկայացված փոխարժեքների տարբերությունը կազմում է 5,5%: