Հայաստանի պետական ճարտարագիտական համալսարանի մոտ 2013թ. ապրիլին 19-ամյա Տիգրան Հայրապետյանին սպանելու մեջ մեղադրվող 17-ամյա Հայկ Աղամալյանը այսօր՝ նոյեմբերի 25-ին, Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանում մեղավոր ճանաչվեց ՀՀ ՔՕ 104-րդ հոդվածի 2-րդ մասի 10-րդ կետով եւ 258-րդ հոդվածի 4-րդ մասով՝ դատապարտվելով 10 տարվա ազատազրկման։ Պատիժի սկիզբը կհաշվի 2013թ. ապրիլի 10-ից։
Նույն գործով ամբաստանյալ Դավիթ Մանուկյանը մեղավոր ճանաչվեց ՀՀ ՔՕ 258-րդ հոդվածի 2-րդ մասի 1-ին կետով եւ 334-րդ հոդվածի 1-ին մասով՝ դատապարտվելով 2 տարվա ազատազրկման եւ 500 հազար դրամ տուգանքի։ Սակայն ՀՀ անկախության 21-րդ տարեդարձի կապակցությամբ համաներում հայտարարելու մասին ՀՀ ԱԺ 2013թ. հոկտեմբերի 3-ի որոշմամբ՝ ամբաստանյալ Դավիթ Մանուկյանը ազատվեց նշանակված պատիժը կրելուց։
Տուժողի իրավահաջորդ Պատվական Հայրապետյանի քաղաքացիական հայցը բավարվեց մասնակիորեն. անչափահաս Հայկ Աղամալյանի ծնողներ Նարինե Արիստակեսյանից եւ Ստեփան Աղամալյանից հօգուտ տուժողի իրավահաջորդ Պատվական Հայրապետյանի դատարանը որոշեց բռնագանձել 1 մլն 430 դրամ գումար որպես պատճառված վնասի հատուցում, ինչպես նաեւ 173 հազար 874 դրամ՝ ՀՀ պետբյուջեի դատական ծախսերի դիմաց։
Նշենք, որ Հայկ Աղամալյանը մինչեւ վերջ իրեն մեղավոր չճանաչեց եւ պահանջում էր իրեն ազատ արձակել։
Հիշեցնենք, որ ըստ մեղադրական եզրակացության՝ Հայկ Աղամալյանը Տերյան փող. 72շ. հարեւանությամբ մի խումբ անձանց հետ վիճաբանության ժամանակ դանակով հարվածել է Տիգրան Հայրապետյանի կրծքավանդակին եւ նրան ապօրինաբար զրկել կյանքից:
