Երևանի քննչական վարչության Կենտրոն և Նորք-Մարաշ վարչական շրջանների քննչական բաժնում հարուցվել է քրեական գործ՝ «Չաո Բամբինո» մանկական սրճարանում փուչիկի պայթյունի դեպքի առթիվ ՀՀ քրեական օրենսգրքի 279-րդ հոդվածի հատկանիշներով, հայտնում է ՀՀ քննչական կոմիտեի տեղեկատվության և հասարակայնության հետ կապերի բաժինը։

2014թ. նոյեմբերի 19-ին` ժամը 22:30-ի սահմաններում, «Ճառագայթային բժշկության և այրվածքների գիտական կենտրոնից» ահազանգ է ստացվել, որ աջ ականջախեցու և պարանոցի շրջանում բոցով առաջին-երկրորդ աստիճանի ջերմային այրվածք ախտորոշմամբ բուժօգնության է դիմել Ա.Բարսեղյանը:

Պարզվել է, որ Ա.Բարսեղյանը վնասվածքներն ստացել է Երևան քաղաքի Մյասնիկյան պողոտայի 5/3 հասցեումգործող «ՉաոԲամբինո» մանկական սրճարանում փուչիկի պայթյունի հետևանքով:

Ահազանգի հիման վրա նյութերի նախապատրաստման ընթացքում պարզվել է, որ 2014թ. նոյեմբերի 19-ին՝ «Փուչիկների աշխարհ» կազմակերպության տնօրենը սրճարան է բերել 10 հատ փուչիկ, որոնք, պայմանավորվածության համաձայն, պետք է լիցքավորված լինեին հելիումով:

Դեպքի առթիվ 2014թ. նոյեմբերի 21-ին հարուցվել քրեական գործ՝ ՀՀ քրեական օրենսգրքի 279-րդ հոդվածի 2-րդ մասի 1-ին կետով՝ Անվտանգության պահանջներին չհամապատասխանող ապրանքներ թողարկելը կամ իրացնելը, աշխատանքներ կատարելը կամ ծառայություններ մատուցելը:

Նախաքննության ընթացքում որոշում է կայացվել Ա.Բարսեղյանին որպես տուժող ճանաչելու մասին: Նշանակվել է դատաբժշկական փորձաքննություն: Միջոցներ են ձեռնարկվում՝ դեպքի բոլոր հանգամանքները պարզելու ուղղությամբ:

Նախաքննությունը շարունակվում է:

Հիշեցնենք, որ նոյեմբերի 19-ի երեկոյան Երեւանի «Չաո բամբինո» մանկական սրճարանում գազով լցված փուչիկների պայթյունից երեխաներից մեկը երկրորդ կարգի այրվածքներ էր ստացել: Սրճարանի տնօրենը NEWS.am-ին ասել էր, որ փուչիկներն իրենք պատվիրել էին «Փուչիկների աշխարհ» լիցենզավորված ընկերությունից, չէին կարող իմանալ, թե դրանք ինչով էին լիցքավորված: