«Մանանա Գրեյն» ՍՊԸ փոխտնօրեն Արմեն Մանուկյանի ավտոմեքենայից 56 միլիոն դրամի գողությանն օժանդակելու համար 5 ու կես տարվա ազատազրկման դատապարտված, HSBC բանկի նախկին աշխատակից, 28-ամյա Աշոտ Առուշանյանը, որը Վերաքննիչ քրեական դատարանում անժամկետ հացադուլ սկսելու մասին հայտարարություն էր արել, արդեն 8-րդ օրն է, հրաժարվում է դադարեցնել հացադուլը։
«Երեկ մեր փաստաբանը եղել է Աշոտի մոտ եւ չնայած մենք իրեն փոխանցել էինք, հորդորել, որ դուրս գա հացադուլից, նա դեռ շարունակում է հացադուլը: Ինքն այս պահին հատուկ բանտախցում է, ունի նյարդային խնդիրներ, նեղվում է, որ անմեղ է, բայց բանտում է, հանցագործների հետ»,- NEWS.am-ի հետ զրույցում ասաց Աշոտ Առուշանյանի մայրը՝ Անահիտ Առուշանյանը՝ ավելացնելով, որ որդին հավանաբար մինչեւ Վերաքննիչի կողմից դատվճռի հրապարակումը հացադուլի մեջ կմնա:
Նոյեմբերի 12-ին Աշոտ Առուշանյանի ծնողները նույնպես անժամկետ հացադուլ էին սկսել նախագահական նստավայրի մոտ, սակայն երկու օր անց նախագահի վերահսկողական ծառայության ղեկավար Հովհաննես Հովսեփյանը ընդունել էր նրանց՝ խոստանալով, որ նրանց որդու դատավճիռն անաչառ կլինի։
«Նախագահի աշխատակազմի ղեկավարը՝ Հովսեփյանը, ամուսնուս հրավիրել էր նախագահական, մեզ հորդորում էր, որ դադարեցնենք հացադուլը: Նա մեզ խոստացել է, որ դատավորի դատավճիռ կայացնելը իր անմիջական հսկողության տակ կլինի»,- նշեց Անահիտ Առուշանյանը:
Հիշեցնենք, որ Երեւանի Կենտրոն եւ Նորք-Մարաշ համայնքների ընդհանուր իրավասության դատարանն Աշոտ Առուշանյանին մեղավոր է ճանաչել ՀՀ քրեական օրենսգրքի 38-177-րդ հոդվածի 3-րդ մասով՝ դատապարտելով նրան 5 տարի 6 ամիս, Էդգար Կարաքեշիշյանին՝ 7 տարի 6 ամիս ազատազրկման։ Ըստ մեղադրական եզրակացության՝ Աշոտ Առուշանյանն օժանդակել էր խմբով առանձնապես խոշոր չափերի գողություն կատարելու դիտավորություն ունեցող իր ընկերներ Էդգար Կարաքեշիշյանին եւ ծանոթ Արտաշես Գալստյանին` նրանց տրամադրելով տեղեկատվություն առանձնապես խոշոր չափերի գումարի վերաբերյալ: Կասկածյալ Արտաշես Գալուստյանն նախաքննության ընթացքում ցուցմունք էր տվել, թե 2011թ. հունիսի սկզբին Օպերայի տարածքում գտնվող սրճարաններից մեկում ինքը, Էդգար Կարաքեշիշյանը եւ Աշոտ Առուշանյանը հանդիպել են, վերջինը Կարաքեշիշյանին է փոխանցել HSBC բանկի համակարգչային բազայից հանված մի թուղթ, որի վրա նշված է եղել տուժողի՝ «Մանանա Գրեյն» ՍՊԸ-ի տնօրենի կողմից տեղափոխված գումարի մասին եւ այլ տեղեկատվություն: Արտաշես Գալուստյանի նկատմամբ խափանման միջոց կալանքը դրանից հետո փոխվել էր, նա ազատ էր արձակվել եւ հաշված օրեր անց նրան հոր հետ գտել էին կախված վիճակում: Առուշանյանը մեղավոր էր ճանաչվել ու դատապարտվել 5 ու կես տարվա ազատազրկման։ Նա պնդում է, որ մեղավոր չէ։