Ֆերգյուսոնում ցուցարարները ոստիկանական մեքենա են այրել այն բանից մի քանի ժամ անց, երբ Միսուրի նահանգապետը ազգային գվարդիայի եւս հարյուր զինծառայողների էր ուղարկել քաղաքում կարգուկանոն հաստատելու համար, փոխանցում է USA Today-ը:
Քաղաքում լարվածություն աճել է մութն ընկնելուց հետո՝ սեւամորթ անզեն դեռահաս Մայքլ Բրաունին սպանած ոստիկան Դարեն Ուիլսոնին դատական պատասխանատվությունից ազատելու որոշման կայացման հաջորդ օրը:
Չնայած զորքերի մեծաթիվությանը, հարյուրավոր ցուցարարներ ուղեւորվել են դեպի քաղաքապետարան՝ կոտրելով ապակիներ եւ այրելով ոստիկանական մեքենա:
Ոստիկանությունը պատասխանել է զրահապատ մեքենաներով, զինված սպաներով եւ շներով, նաեւ արցունքաբեր գազ է կիրառել: Ցուցարարները արկեր են նետել ոստիկանների վրա: Ի պատասխան ոստիկանությունը 80-ից ավելի կարգազանցի է կալանավորել:
Իրենց անհամաձայնությունը խաղաղ կերպով արտահայտելու կոչ է արել ԱՄՆ-ի նախագահ Բարաք Օբաման՝ նշելով, որ ոստիկանները պետք է զսպվածություն եւ քաղաքացիների հանդեպ հոգատարություն ցուցաբերեն: Դատարանի որոշման առնչությամբ Օբաման նշել է, որ այն տարաձայնությունների տեղիք էր տալու ցանկացած պարագայում:
