Ճապոնիայում սկսվել է երկրի խոշորագույն Ասո գործող հրաբխի ժայթքումը, հայտնում է «ՏԱՍՍ»-ը՝ վկայակոչելով տեղական օդերեւութաբանական վարչությանը:
Աղբյուրի փոխանցմամբ՝ հրաբխին հարակից տարածքներից արագորեն տարհանում են բազմաթիվ զբոսաշրջիկների, արգելված է հրաբխային գոտուն 1 կմ-ից ավելի մոտենալը: Ասոյի ծայրամասերում թույլ ցնցումներ են, իսկ մոխիրն արդեն 30 կմ շառավղով տարածվել է:
Ասոն աշխարհի խոշորագույն հրաբուխներից մեկն է: Բարձրությունը 1592 մետր է: Հրաբխի խառնարանը նույնպես ազդեցիկ չափեր ունի. շրջագիծը կազմում է շուրջ 120 կմ:
Հիշեցնենք, որ հոկտեմբերին Ճապոնիայի կենտրոնական մասում մեկ այլ, ավելի համեստ հրաբուխ է ժայթքել՝ Օնտակեն: Այդ ժամանակ շիկացած քարերի ռմբակոծության եւ թունավոր գազերի արտանետումների հետեւանքով ավելի քան 60 մարդ էր մահացել:
