Երեւան-Գյումրի ավտոճանապարհին՝ Հոռոմի խաչմերուկում տեղի ունեցած ողբերգական վթարի գործով մեղադրյալ 44-ամյա Մանվել Վարդանյանին նորից կհարցաքննեն: Այս մասին NEWS.am-ի թղթակցի հետ զրույցում ասաց փաստաբան Լիանա Բալյանը:
Նորից հարցաքննելու համար միջնորդությամբ դիմել էր փաստաբանը, որը բավարարվել է: Լիանա Բալյանն ասաց, որ իր պաշտպանյալին հոգեբան տրամադրելուց հետո նրա ինքնազգացողությունը լավացել է: Փաստաբանի ներկայացրած մյուս միջնորդություններից առայժմ որեւէ նորություն չկա: Նա շարունակում է մնալ «Արթիկ» ՔԿՀ-ում, որտեղ առկա պայմաններից դժգոհ չէ: Լիանա Բալյանը տեղեկացրեց նաեւ, որ նշանակված է համալիր փորձաքննություն, այլ փորձաքննություններ եւս կնշանակվեն:
Ինչպես ավելի վաղ հաղորդել էր NEWS.am-ը նոյեմբերի 10-ի երեկոյան՝ ժամը 19։15-ի սահմաններում, խոշոր ավտովթար է տեղի ունեցել Շիրակի մարզում. Երեւան-Գյումրի ավտոճանապարհի` Հոռոմ գյուղի խաչմերուկում մարդատար «Գազել» մակնիշի ավտոմեքենան բախվել է «Կամազ» մակնիշի բեռնատարին, ինչի հետեւանքով «Գազելը» պայթել է։ Նախնական տեղեկություններով՝ վթարի պահին «Գազելի» մեջ եղել է 14 ուղեւոր, որոնցից 7-ը տեղում մահացել են, իսկ 7-ը՝ տեղափոխվել բժշկական կենտրոն։ Փաստի առթիվ Շիրակի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի՝ 242-րդ հոդվածի 3-րդ մասի հատկանիշներով։ «Գազելին» բախված «Կամազ» մակնիշի բեռնատարի վարորդը՝ Մ.Վարդանյանը, կալանավորված է: