Ադրբեջանի կողմից նոյեմբերի 12-ին հայկական ուղղաթիռի խոցումը հետեւանքն է այն բանի, որ միջազգային հանրությունը բավական քաղաքական կամք չի դրսեւորել: Այս մասին այսօր` նոյեմբերի 26-ին, լրագրողների հետ զրույցում ասաց Ազգային ժողովի ՀՀԿ խմբակցության պատգամավոր Գագիկ Մինասյանը:
Պատգամավորի խոսքով` տարիներ շարունակ հայկական կողմը պնդել է, որ մեր տարածաշրջանում խաղաղությունն ապահովելու համար հարկավոր է կատարել. ցանկացած միջադեպ պետք է քննվի մինչեւ վերջ եւ մեղավորները պետք է դատապարտվեն, ինչպես նաեւ շփման գծից պետք է հեռացնել դիպուկահարներին:
«Ադրբեջանը տեւական ժամանակ կարողանում է միջազգային հանրությանը հետ պահել այս քայլերի կատարումից: Այն, ինչ կատարվեց նոյեմբերի 12-ին, հետեւանք էր, որ միջազգային հանրությունը բավական քաղաքական կամք չդրսեւորեց: Կրկին միջազգային հանրությունը իր բոլոր ելույթներում խոսքը հղում է երկու կողմերին: Եթե այսպես շարունակվի, ապա նման ծանր միջադեպերը շարունակական են լինելու: Միջազգային հանրության արատավոր վերաբերմունքը բերելու է նրան, որ նրանք նույնպես տուժելու են»,- ասաց նա:
Գագիկ Մինասյանը համոզված է, որ եթե մեր տարածաշրջանում պատերազմ սկսվի, ապա տուժելու են նաեւ այն երկրները, որոնք լռում են:
Հիշեցնենք, որ ԼՂՀ ՊՆ-ի փոխանցմամբ՝ ղարաբաղա-ադրբեջանական սահմանի արեւելյան հատվածի օդային տարածքում նոյեմբերի 12-ին, ժամը 13.45-ի սահմանում ուսումնավարժական թռիչքի ժամանակ ադրբեջանական ԶՈւ-ի կողմից հրադադարի ռեժիմի խախտման արդյունքում խոցվել էր ԼՂՀ ՌՕՈւ «Մի-24» ուղղաթիռը: Խոցման վայրը շփման գծին չափազանց մոտ էր: Հակառակորդը շարունակում էր տարբեր տրամաչափի հրաձգային զենքերից ինտենսիվ կրակ վարել դեպքի վայրի ուղղությամբ՝ թույլ չտալով մոտենալ ուղղաթիռի անկման վայրին: Ուղղաթիռի խոցումից տասն օր անց՝ նոյեմբերի 22-ին, ԼՂՀ զինված ուժերը հատուկ գործողություն իրականացրին, որի արդյունքում դուրս բերեցին եւ ընտանիքներին հանձնեցին Ազատ Սահակյանի դին, Սերգեյ Սահակյանի եւ Սարգիս Նազարյանի մասունքները։
