Ադրբեջանի քաղաքականությունում ինչ-ինչ դրական փոփոխություններ ակնկալելու կարիք չկա: Այս մասին նոյեմբերի 26-ի մամուլի ասուլիսում հայտարարել է Հայաստանի առաջին օմբուդսմեն, «Ընդդեմ իրավական կամայականությունների» ՀԿ նախագահ Լարիսա Ալավերդյանը՝ անդրադառնալով հարցին, թե կարող է արդյոք ինչ-որ բան փոխվել Բաքվի քաղաքականությունում՝ ԵՏՄ-ին Հայաստանի անդամակցելուց հետո:
Իլհամ Ալիեւը, ըստ նրա, իրեն այնպիսի վիճակում է դրել, որ այլեւս հասարակությանը չի կարող խաղաղության կոչ անել, չի կարող փոխել ձեռագիրը: Գերտերությունների համար, հավելել է նա, ձեռնտու է գործ ունենալ մեկ պետության հետ, Իլհամ Ալիեւին էլ է ձեռնտու: «Նա լիակատար կախվածություն ունի այդ գերտերություններից: Նրան մնում է սոսկ խոսքերով իր գիծն առաջ տանել ներքին լսարանի համար», - ընդգծել է Լարիսա Ալավերդյանը: Նա չի կարծում, թե Արեւմուտքը գրագետ եւ հեռատես է գործում, քանի որ Ռուսաստանը նրա համար կարող է ավելի հուսալի գործընկեր լինել, քան Ադրբեջանն ու Թուրքիան: