Գլխավոր դատախազության շենքի առաջ ինքնահրկիզման փորձ արած երիտասարդ մոտ մեկ ամիս առաջ էլ փորձել է իրեն ցած նետել Դավթաշենի կամրջից: Այս մասին հայտնեցին NEWS.am-ի աղբյուրները:
Մեր տեղեկություններով՝ երիտասարդի նման ծայրահեղ քայլերով կյանքի վերջ տալու փորձերը պայմանավորված են իրավապահ համակարգի հետ ունեցած խնդիրներով: Բանն այն է, որ ծառայության ընթացքում ինչ-որ վիճաբանություն ունենալու դեպքով հարուցված գործի շրջանակներում նա ցուցմունք է տվել, որի հիման վրա մարդ են դատել: Մասնավորապես, երիտասարդը իր ծառայակցին մեղադրանքներ է ներկայացրել՝ ասելով, թե իրեն ծեծել է: Այնուհետեւ, ինքնասպանության փորձ կատարողը որոշել է փոխել ցուցմունքները, սակայն դրանք այժմ հաշվի չեն առել, ինչի դեմ էլ նա բողոքում է: Այս գործով, ի դեպ, Վճռաբեկ դատարան բողոք է ներկայացված:
Ավելի վաղ NEWS.am-ը հայտնել էր, որ Շիրակի մարզի 21-ամյա բնակիչ Դ. Ն.-ն Գլխավոր Դատախազության շենքի առաջ ինքնասպանության փորձ է կատարել ինքնահրկիզման եղանակով: Երիտասարդը իր վրա դյուրավառ հեղուկ է լցրել՝ փոձելով ինքնահրկիզվել: Ոստիկանության աշխատակիցները նրան տարել են Կենտրոնականի բաժին, կատարվում է հետաքննություն:
