Ստվերային եկամուտներ ունեցողները դեռ չեն ձգտում օրինականացնել դրանք անշարժ գույքի շուկայում: Այդ մասին այսօր՝ նոյեմբերի 26-ին, մամուլի ասուլիսի ժամանակ հայտարարեց Հայաստանի գործատուների միության գործադիր տնօրեն Գագիկ Մակարյանը: Նրա խոսքով՝ լսելով ստվերից դուրս գալու անհրաժեշտության մասին իշխանությունների ահազանգերը՝ շատ մարդիկ կարող էին օրինականացնել իրենց կուտակած միջոցները անշարժ գույքի միջոցով: Սակայն Հայաստանում նման բան դեռեւս չկա:
Ինչ վերաբերում պետության հաջորդ քայլին՝ հուլիսի 1-ից պետական ծառայողների աշխատավարձերի բարձրացմանը, ապա այստեղ հնարավոր է որոշակի ակտիվացում նկատել, նշեց «Ակցեռն» անշարժ գույքի կորպորացիայի ղեկավար Հակոբ Բաղդասարյանը: Ճիշտ է, անշարժ գույքի շուկայի առանձնահակտությունը կայանում է նրանում, որ բացասական փոփոխությունները առաջինն այդտեղ են արտացոլվում, իսկ դրականները՝ վերջինը: «Ինքներդ եք հասկանում, որ պետծառայողները, առաջին հերթին, կսկսեն մտածել կենսական կարիքների մասին եւ վերջին հերթին՝ բնակարանի: Մեզնից յուրաքանչյուրն այդպես կվարվեր», - փաստեց Բաղդասարյանը: