ՀՀ կառավարությունը անապահով ընտանիքներին կօգնի թվային հեռուստատեսություն դիտել: Այս մասին նոյեմբերի 26-ին տրանսպորտի եւ կապի նախարարությունում հեռուստատեսության ոլորտի ներկայացուցիչների հետ հանդիպմանը հայտարարել է նախարար Գագիկ Բեգլարյանը:
Հեռուստացույցին միացվող սարքերը, որոնք անալոգային ազդանշանները թվայնացնում են, կարող են տարբեր գների լինել, հավելել է նախարարը: Հարցին, թե արդյոք դրանք միջինը 100 դոլար են, Բեգլարյանը նշել է, որ այդ տվյալները չափազանցված են:
Այնուամենայնիվ, կառավարությունն անվճար կտրամադրի այդ սարքերը նրանց, ովքեր գրանցված են սոցապահովման համակարգում՝ շուրջ 100 հազար մարդու: «Բնականաբար, ոչ բոլորը կարող են համաձայնել, այդ պատճառով չգիտենք, թե որքան սարք է հարկավոր լինելու», - բացատրել է նախարարը: Նա քաղաքացիներին կոչ է արել կենցաղային տեխնիկա գնելիս անպայման ճշտել՝ ընտրած հեռուստացույցի մոդելն արդյոք համատեղելի է թվային հեռարձակմանը:
Հիշեցնենք, Հայաստանը՝ որպես Հեռահաղորդակցության միջազգային միության (ITU) անդամ, «Հեռուստատեսության եւ ռադիոյի մասին» օրենքում ամրագրել է 2015թ.-ից թվային հեռարձակման անցնելը: Թվայնացման աշխատանքներն ամբողջությամբ ավարտված կլինեն 2015թ. հուլիսի 10-ին: