Եվրասիական տնտեսական հանձնաժողովում կընդգրկվեն Հայաստանի 3 ներկայացուցիչներ: Այդ մասին այսօր՝ նոյեմբերի 26-ին ԱԺ տնտեսական հարցերով մշտական հանձնաժողովի նիստին հայտարարեց ֆինանսների փոխնախարար Սուրեն Կարայանը՝ ներկայացնելով Եվրասիական տնտեսական միությանը Հայաստանի անդամակցության մասին պայմանագիրը:
Հիշեցնենք, որ ԵՏՀ-ում պատվիրակվում է յուրաքանչյուր անդամ-երկրի 3-ական ներկայացուցիչ, որոնցից մեկը դառնում է նախագահ, մյուսները՝ ճյուղային նախարարներ: Ներկայումս հանձնաժողովում հաշվվում է 9 անդամ (3-ական Ռուսաստանից, Բելառուսից եւ Ղազախստանից), իսկ Հայաստանի անդամակցությամբ անդամների թիվը կավելանա երեքով: Հայաստանից նախարարների թեկնածուները, ինչպես եւ ոլորտները, որոնք կվստահեն նրանց, դեռeւս չեն որոշվել:
Նախագահի եւ վարչապետի մակարդակով Հայաստանը կմտնի նաեւ ռազմավարական որոշումներ կայացնող ԵՏՄ-ի Բարձրագույն եվրասիական տնտեսական խորհուրդ: «Այստեղ այդ որոշումներն ընդունվում ե կոնսենսուսի հիման վրա եւ պահանջում են բոլոր կողմերի համաձայնությունը», - ընդգծեց Կարայանը:
Հիշեցնենք, մայիսին Ռուսաստանը, Բելառուսն ու Ղազախստանը ստորագրել եւ վավերացրել էին 2015թ. հունվարի 1-ից Եվրասիական տնտեսական միություն ստեղծելու պայմանագիրը, հոկտեմբերի 10-ին ստորագրվել էր Միությանը Հայաստանի անդամակցության մասին պայմանագիրը:
