Տիեզերական տարածությունում կարող էին գոյություն ունենալ միջուկային պոտենցիալ ունեցող ուժեր կամ էակներ, որն օգտագործելու արդյունքում էլ, ենթադրաբար, ոչնչացվել է Մարսի վրա հնագույն կյանքը: Նման ենթադրություն է առաջ քաշել պլազմային մասնիկների ֆիզիկայի պրոֆեսոր, ԱՄՆ օդատիեզերական պաշտպանության հրամանատարության նախկին աշխատակից, ամերիկյան հետազոտող Ջոն Բրանդենբուրգը: Այս մասին գրում է ՌԻԱ Նովոստին:
«Բրանդերբուրգն ընդգծել է, որ գոյություն ունեն Մարսի վրա միջուկային զգալի պայթյունի առկայության վառ ապացույցներ, որոնք ոչնչացրել են Մարսի երկու մասերի՝ Սիդոնիայի եւ Ուտոպիայի հնագույն բնակավայրերը: Նրա կարծիքով, պայթյունները ծրագրվել եւ իրականացվել են զարգացածության բարձր մակարդակ ունեցող էակների, հավանաբար՝ այլմոլորակայինների կողմից: Իսկ պայթյունի փաստի մասին է վկայում մոլորակի մակերեւույթի գույնը»,- գիտնականի աշխատության բովանդակությունն է մեջբերում գործակալությունը:
Բրանդերբուրգի հետազոտությունում նշվում է, որ հաշվի առնելով Մարսի մթնոլորտում իզոտոպների թիվը, որոնք նման են Երկրի վրա միջուկային աղետներից հետո արձանագրվածներին, Մարսը կարող է լինել քաղաքակրթության օրինակ, որը մակերեւույթից անհետացել է տիեզերքից միջուկային հարձակման արդյունքում: