Նոյեմբերի 25-ին արտարժույթի փոխարժեքի անսպասելի կտրուկ աճը որոշակի սենսացիա առաջացրեց: Չէ՞ որ ամերիկյան 1 դոլարի դիմաց 435 դրամ փոխարժեքի մակարդակ Հայաստանում չի գրանցվել վերջին 8 տարիներին՝ 2006 թվականի մայիսից ի վեր: Նկատենք, որ դոլարի փոխարժեքի դինամիկայի միտումն ընթացիկ տարում անկման բնույթ է կրել: Նոյեմբերին դոլարի փոխարժեքի որոշակի աճ արձանագրվեց, որը ռեկորդային մակարդակի հասավ վերոնշյալ օրը:

Մեզ մոտ արժութային շուկայում կարծես լիարժեք լիբերալիզմ է տիրում՝ հինգ տարի առաջ ֆորմալ առումով դրամն ազատ հոսքի թողնելուց հետո: Սակայն շատ քաղաքացիներ կասկածում են (եւ, հավանաբար, ոչ անհիմն), որ դոլարի ամենօրյա փոխարժեքը սահմանվում է արժութային բորսայում: Այսինքն՝ այդ ոլորտում կասկածում են Կենտրոնական բանկի «անտեսանելի ձեռքի» առկայությանը:

Ամեն դեպքում, Հայաստանում ԱՄՆ դոլարի հանդեպ ռուսական ռուբլու խաչաձեւ փոխարժեքի դինամիկան, ինչպես հարկն է, հետեւում է Ռուսաստանում դոլարի փոխարժեքին: Իսկ այստեղ, ինչպես հայտնի է, մի շարք բացասական գործոնների ազդեցության հետեւանքով, ռուբլին հետեւողականորեն «թուլանում է»: Արժութային շուկայում տիրող իրարանցումը չհաղթահարեցին նույնիսկ Ռուսաստանի կենտրոնական բանկի մասշտաբային արժութային ներդրումները: Այսպես, միայն հոկտեմբերին բանկն այդ նպատակով 27.2 մլրդ դոլար եւ 1.6 մլրդ եվրո է վաճառել:

Հետաքրքիր է, որ ընթացիկ տարում Ռուսաստանի Կենտրոնական բանկն ակտիվորեն ոսկի էր գնում: Միջազգային փորձագետները կարծում են, որ ոսկին գնում են՝ արտաքին շուկայում տեղական արտադրության մետաղի հետ կապված խնդիրների պատճառով, որոնք արեւմտյան մի շարք երկրների պատժամիջոցների հետեւանք են: Բացի այդ, հայրենական թանկարժեք մետաղը Ռուսաստանի Կենտրոնական բանկը կարող է գնել «թուլացող» ռուբլով: Միայն թե փողերը տպող սարքն արդյունավետ աշխատի: Բացի այդ, Ռուսաստանի միջազգային պահուստներում դոլարի դեֆիցիտի սպառնալիքը կնվազի դրանցում ոսկու մասնաաժնի ավելացման հաշվին:

Վերջում նշենք բավական հետաքրքիր մի զուգադիպություն: Ինչպես հայտնի է, բնական գազի խոշոր սպառողներն ընկերությանը վճարում են 276.98 դոլար՝ 1.000 խորանարդ մետրի դիմաց: Ընդ որում, դոլարը դրամով փոխանակվում է՝ ելնելով վճարմանը նախորդող ամսվա 25-ին Հայաստանում դոլարի փոխարժեքից: Չնայած ռեկորդը սահմանվել է նոյեմբերի 24-ին, կանաչ թղթադրամների փոխարժեքը հաջորդող օրերին նույնպես բավական բարձր էր՝ 433.68 դրամ: Ահա այսպիսի տհաճ անակնկալ ընկերության բաժանորդների համար: