Ղազախստանում պետական ծառայողներին նվերներ տալու կանոններ են մշակում: Այս մասին հաղորդում է Lenta.ru-ն՝ վկայակոչելով երկրի պետական ծառայության եւ կոռուպցիայի դիմագրավման հարցերով գործակալության նախագահ Քայրաթ Քոժամժարովի հայտարարությունը:
«Արդեն պետական ծառայողների եւ ղեկավարների համար շահերի բախումը կանխելու պրակտիկա կա՝ կապված նվերներ ստանալու հետ»,-ասել է նա:
Քայրաթ Քոժամժարովը հայտարարել է, որ բարձրաստիճան պաշտոնյաների համար կսահմանափակվի ինչ-որ ծառայությունների դիմաց նվերներ ստանալու պրակտիկան:
Դա կլինի առաջին փաստաթուղթը, որտեղ կնշվեն մանրամասն պայմանները: Մինչ այդ պաշտոնյաների գործունեությունը կարգավորվում էր երկրի օրենսդրությամբ եւ պետծառայողի օրենսգրքով: