Ուկրաինայի ֆոնին, որը խլում է համընդհանուր ուշադրությունն ու ռեսուրսները, ոչ Մոսկվան, ոչ Արեւմուտքը հետխորհրդային տարածքում նոր թեժ կետերի ժամանակը չունեն: Այս մասին առցանց մամուլի ասուլիսի ժամանակ հայտարարել է ռուսաստանցի վերլուծաբան, միջազգային անվտանգության խնդիրներով զբաղվող ՊԻՌ-կենտրոնի փոխնախագահ Դմիտրի Պոլիկանովը՝ անդրադառնալով NEWS.am-ի հարցին, թե որքանո՞վ է հավանական իրավիճակի հետագա լարումը ԼՂ հակամարտության շփման գոտում, Ադրբեջանի ԶՈՒ կողմից ղարաբաղյան ուղղաթիռը խոցելուց հետո:
Նրա խոսքով՝ գայթակղություն կա, հատկապես միջազգային հարաբերություններում ուժի գործոնի աճի ֆոնին: «Բայց հույս ունեմ, որ առողջ դատողությունը կհաղթանակի եւ փոխհրաձգությունից ու նման միջադեպերից այն կողմ չեն անցնի»,-ասել է Պոլիկանովը:
Հիշեցնենք, որ նոյեմբերի 12-ին Ադրբեջանի զինված ուժերը խոցել են ԼՂ Զինված ուժերին պատկանող, ուսումնավարժանք իրականացնող ռազմական ուղղաթիռը: