ՀՀ վարչապետ Հովիկ Աբրահամյանն ամեն ինչ անում է, որ եռյակը վստահի իրեն ու կառավարությանը: Այս մասին այսօր՝ նոյեմբերի 26-ին, ՀՀԿ գործադիր մարմնի նիստից առաջ լրագրողներին ասաց Հովիկ Աբրահամյանը:
Լրագրողի հարցին՝ թե իր կարծիքով ինչու եռյակը չընդունեց 12 կետերի շուրջ համագործակցության նպատակով 3 հոգանոց թիմ կազմելու՝ կառավարության առաջարկը, վարչապետը հորդորեց այդ հարցով դիմել եռյակի ներկայացուցիչներին:
«Ճիշտ ու կոռեկտ կլինի, որ իրենք պատասխանեն: Ես ամեն ինչ անում եմ, որ ինձ ու կառավարությանը վստահեն: Իրենց հետ մենք խոսում ենք, բանակցում ենք, շփվում ենք: Ես համոզված եմ, որ ապագայում մենք մեր խոստումները իրականացնելու ենք: Որեւէ հարց չի եղել, որ մենք պայմանավորվել ենք ու չենք իրականացրել»,-ասաց նա:
Լրագրողներից մեկի դիտարկմանը, որ ոչ իշխանական ուժերը ցանկանում են քննարկել մեծամասնական ընտրակարգը վերացնելու եւ 100 տոկոսանոց համամասնական ընտրակարգի անցնելու հարցը, վարչապետն պատասխանեց՝ կքննարկենք:
«Իրենք նույնիսկ առաջարկել էին, որ 10-րդ կետից սկսենք, մենք նույնիսկ դրան էլ ենք համաձայնել, մենք կառուցողական ենք, ուզում ենք ընդդիմության հետ աշխատել: Մեր նպատակն է, որ միասին փորձենք ճիշտ որոշում կայացնել: Իսկ եթե իրենք չեն ուզում քննարկել, ապա մենք անելիք չունենք»,-ասաց նա: