Ադրբեջանը ամենաբարձր մակարդակով չի բացառում պատերազմի վերսկսումը, եւ վերջին տարիներին իր գործողություններով հաճախ է խախտում հրադադարի ռեժիմը: Այս մասին ««Դեն TV» առցանց հեռուստաալիքին տված հարցազրույցում նշել է ռուսաստանցի քաղաքական գործիչ, ՌԴ պետդումայի պատգամավոր Կոնստանտին Զատուլինը:
Նրա խոսքով, մինչ օրս նման լայնամասշտաբ միջադեպ չէր եղել (նկատի ունի ղարաբաղյան ուղղաթիռի խոցումը-խմբ), եւ չէին եղել հայտարարություններ, թե Ադրբեջանը փակում է ԼՂՀ օդային տարածքը, որը փաստացի Ադրբեջանը չի վերահսկում:
«Ես շարունակում եմ հույս ունենալ, որ հակամարտության էսկալացիան չի անցնի այն միջադեպերից, որոնք արդեն տեղի ունեցան: Իհարկե, դա արտառոց միջադեպ էր, այն դուրս է հրադադարի ռեժիմի արդեն սովորական դարձած խախտումների շրջանակից: Վերջին տարիներին Ադրբեջանն ակտիվորեն սադրել է, իսկ Հայաստանն իր հերթին պատասխանել է»,-նշել է Զատուլինը:
Նրա խոսքով՝ յուրաքանչյուր կողմ մեղադրում է մյուսին, որ սադրողը հենց դիմացինն է: «Բայց ինձ թվում է, որ ցանկացած մեկի համար, որն առաջնորդվում է հավերժական հռոմեական հարցով՝ «ո՞ւմ է ձեռնտու», հասկանալի է դառնում, որ լարվածությունը հակամարտության գոտում ձեռնտու է առաջին հերթին Ադրբեջանին, քանի որ նա հանդես է գալիս ստատուս քվոն փոխելու օգտին, չի ցանկանում համաձայնել Լեռնային Ղարաբաղի անկախության հետ, եւ ընդհանուր առմամբ, Բաքվի այդ տեսակետը լավ հայտնի է»,-ընդգծել է Զատուլինը:
Հիշեցնենք, որ նոյեմբերի 12-ին Ադրբեջանի Զինված ուժերը խոցել են ԼՂՀ Զինված ուժերին պատկանող «Մի-24» ռազմական ուղղաթիռը, որն այդ պահին ուսումնավարժական թռիչք էր իրականացնում: Երեք հայ օդաչուների զոհվել են:
