Ղարաբաղյան հակամարտության գոտում իրավիճակի ցանկացած սրացում այսպես թե այնպես Ռուսաստանին ընտրության առջեւ է կանգնեցնում, որը Ռուսաստանը չէր ցանկանա կատարել: Այս մասին «Դեն ՏՎ» վերլուծական առցանց-հեռուստաալիքին տված հարցազրույցում հայտարարել է Ռուսաստանի Պետդումայի պատգամավոր Կոնստանտին Զատուլինը:
Նրա համոզմամբ, ցանկացած սրացում որոշակի հիմք ունի. Ադրբեջանի համար որոշակիորեն կարեւոր է ղարաբաղյան հակամարտությունը միջազգային հանրության ուշադրության կենտրոնում պահել, որպեսզի հիշեցնի չլուծված խնդրի մասին: «Հայաստանն ու Արցախը, իրենց հերթին, չեն կարող ստատուս-քվոյի որեւէ խախտում թույլ տալ, եւ դա որոշակի խնդիր է ստեղծում Ռուսաստանի համար: Ռուսաստանը, իհարկե, դաշնակցային պարտավորություններ ունի Հայաստանի հանդեպ, մյուս կողմից՝ Ռուսաստանը նոր բարիդրացիական հարաբերություններ է զարգացնում Ադրբեջանի հետ»,- ընդգծել է Կոնստանտին Զատուլինը:
Նա նաեւ հավելել է, որ հակամարտության գոտում իրավիճակի ցանկացած սրացում այսպես թե այնպես Ռուսաստանին ընտրության առջեւ է կանգնեցնում, որը Ռուսաստանը չէր ցանկանա կատարել: «Ինձ թվում է՝ այդ հակամարտությունում Ռուսաստանի հետաքրքրությունն այս փուլում կայանալու է նրանում, որպեսզի բոլոր ուժերով թույլ չտա իրավիճակի սրացում, ռազմական գործողությունների վերսկսում, երկու կողմերին էլ հասկացնի, որ ես, ահա, ամենիա առաջ ցանկանում եմ ասել ադրբեջանական կողմից, որ լարվածության ռազմավարությունն ի վերջո կարող է շրջվել հենց Ադրբեջանի դեմ»,- հայտարարել է ռուսաստանցի քաղաքական գործիչը:
Նա ընդգծել է, որ այնտեղ տնտեսական հաջողությունները, նավթից եւ գազից ստացվող եկամուտները, այդ եկամուտների բաշխումն Ադրբեջանում կատարվում է այնպես, ինչպես ընդունված է ասիական երկրում. դրանք բաժին չեն հասնում բոլորին եւ յուրաքանչյուրին, այլ հիմնականում տեղ են գտնում իշխանությունների եւ նրանց մտերիմ գործարարների գրպաններում: «Այդ պատճառով Ադրբեջանում սոցիալական լարվածության պայմանները միշտ եղել եւ լինելու են, եւ պետք չէ ռիսկի դիմել հանուն երեւակայական նպատակների եւ ցանկացած այլ բանի, որը կապված է Լեռնային Ղարաբաղի հետ»,- նշել է Կոնստանտին Զատուլինը:
