Ամերիկյան Google ընկերությունը ԱՄՆ-ի կառավարության, ավելի ճիշտ՝ Պետդեպի համար է աշխատում: Նման բացահայտում է արված WikiLeaks-ի հիմնադիր Ջուլիան Ասանժի գրքում, որը լույս կտեսնի դեկտեմբերի 1-ին:
Իսպանական Publico.es-ի տվյալով՝ նման եզրահանգման Ասանժը եկել է Google-ի նախագահ Էրիկ Շմիդտի եւ տնօրենների խորհրդի անդամ Ջարեդ Քոենի հետ 2011թ. հունիսի հանդիպումից հետո: Անգլիայում կայացած երկարատեւ հանդիպմանը ներկա էին նաեւ ոմն Լիզա Շիլդս եւ Սքոթ Մալքոմսոն, որոնք, ինչպես հետո պարզել էր WikiLeaks-ի հիմնադիրը, Վաշինգտոնի դիվանագիտական էմիսարներն էին:
«Հենց այդ պահին ես գիտակցեցի, որ Էրիկ Շմիդտը գուցե եւ միայն Google-ի էմիսարը չէ: Ինձ այցելեցին մի խումբ անձինք, որոնց քառորդ մասը Google-ի ներկայացուցիչներն էին, երեք քառորդը՝ ԱՄՆ-ի Պետդեպի ներկայացուցիչներ»,- գրում է Ասանժը:
Ըստ նրա՝ Google-ը ՀԴԲ-ին եւ ԿՀՎ-ին գրեթե անսահմանափակ մուտքի հնարավորություն է ընձեռում իր օգտվողների նամակագրությանը՝ առանց դատախազության կամ դատարանի պահանջի:
Ըստ ՏԱՍՍ-ի՝ «Թե ինչպես Google-ը գտավ WikiLeaks-ը» իսպաներեն գրքի շնորհանդեսը Մադրիդում կկայանա դեկտեմբերի 3-ին: Միջոցառման ընթացքում նախատեսվում է «կլոր սեղան» եւ համացանցով կապ Ասանժի հետ, որը գտնվում է Լոնդոնում Էկվադորի դեսպանատանը:
