Զարգացման հայկական գործակալությունը Լիտվայի Արդյունաբերողների Միության հետ համատեղ եւ Լիտվայի Հանրապետությունում Հայաստանի Հանրապետության դեսպանության աջակցությամբ ս.թ. նոյեմբերի 27-28-ին Լիտվայի մայրաքաղաք Վիլնյուսում կազմակերպում են հայ-լիտվական գործարար համաժողով, երկուստեք հանդիպումներ եւ հայկական արտադրանքի համտես:
Գործարար համաժողովը հարթակ կհանդիսանա երկու երկրների գործարարների միջեւ առեւտրատնտեսական հարաբերությունների զարգացման եւ ընդլայնման, նոր գործարար կապերի ստեղծման եւ ուղղակի ներդրումների ծավալների ավելացման համար: Համաժողովի ընթացքում գործարարները նաեւ հնարավորություն կունենան հանդիպել եւ բանակցել լիտվացի գործարարների հետ, ովքեր նախնական հետաքրքրություն են հայտնել Հայաստանում գործնական կապեր հաստատելու վերաբերյալ: Միջոցառման շրջանակներում նախատեսվում է նաեւ համատեղ գործունեության հուշագրերի ստորագրում մի քանի ոլորտներում:
Նշյալ միջոցառումը հնարավորություն կտա հայ եւ լիտվացի գործարարներին սերտորեն համագործակցել բանկային եւ ֆինանսական գործունեության, էներգետիկայի/ էներգախնայողության, վերականգնող էներգետիկայի/, լոգիստիկայի, քիմիական արդյունաբերության, սննդի վերամշակման, կոնյակագործության եւ գինեգործության, գյուղատնտեսության, տեքստիլի եւ թեթեւ արդյունաբերության, փայտամշակման եւ կահույքագործության, դեղագործության, բիոտեխնոլոգիաների, բժշկական սարքավորումների, տեղեկատվական տեխնոլոգիաների, շինարարության եւ այլ ոլորտներում:
Կներկայացվի Հայաստանի ներդրումային միջավայրի, լոգիստիկայի եւ ենթակառուցվածքային ոլորտի, «Մերիդիան» Ոսկերչության Ազատ տնտեսական գոտու, Հայաստանի ՏՏ ոլորտի, Լիտվայի Ներդրումային միջավայրի եւ արտահանման վերաբերյալ շնորհանդեսներ: