ՀՀ կառավարությունը հաստատել է Եվրոպական ներդրումային բանկի հետ 25,5 մլն եվրոյի վարկային համաձայնագիրը: Ծրագիրը ավելի խոշոր՝ 73 մլն եվրոյի նախագծի մի մասն է: Վարկը կտրվի ժամանակացույցի համաձայն՝ մինչեւ 10 փոխանցումներով:

Գումարները կուղղվեն մարզերում խմելու ջրի օպերատորներին: Ծրագրի շրջանակում նախատեսվում է շուրջօրյա ջրամատակարարում ապահովել «Լոռի-ջրմուղկոյուղու» (ք. Վանաձոր եւ 16 գյուղ) եւ «Շիրակ-ջրմուղկոյուղի» (ք. Գյումրի եւ 14 գյուղ) սպասարկած տարածքներում, «Շիրակ-ջրմուղկոյուղու» գոտու այլ բնակավայրերում էլ՝ ավելացնել ջրամատակարարման ժամերը  (այսօր օրական 4 – 6 ժամ է):

Արմավիրի մարզում ( «Նոր Ակունք») նախատեսվում է մոտ 10 կմ ջրատար խողովակներ վերանորոգել, նաեւ կեղտաջրերի զտման կայան հիմնել, վերականգնել կոյուղատար ցանցը:

«Հայջրմուղկոյուղու» սպասարկած 6 քաղաքներում եւ 37 գյուղերում եւս նախատեսվում է վերականգնել ցանցի խնդրահարույց հատվածները:  Ծրագրի համաֆինանսավորող կլինեն գերմանական KfW բանկը եւ Եվրոպական հարեւանության ներդրումային ծրագիրը (EU NIF), ինչպես նաեւ ՀՀ կառավարությունը: