Մեր կողմից ներկայացված 12 կետերը չենք տարանջատում իրարից, կան 4-5 կետեր, որոնց իրականացումը ժամանակ, ռեսուրս չի պահանջում: Այս մասին այսօր՝ նոյեմբերի 27-ին, լրագրողների հետ հանդիպմանն ասաց «Բարգավաճ Հայաստան» խմբակցության պատգամավոր Միքայել Մելքումյանը՝ հավելելով, որ այդ 12 կետերին հաջորդելու է ուրիշ 12 կետ:
Նա վստահ է, որ 100 տոկոսանոց համամասնական ընտրակարգին այլընտրանք չկա:
Իսկ ասուլիսի մյուս բանախոսը՝ ՀՀԿ-ական պատգամավոր Սուքիաս Ավետիսյանը հակադարձում է՝ նշելով, որ քաղաքագիտությունը հստակ սահմանել է համամասնականի եւ մեծամասնականի առավելություններն ու թերությունները: Նա նշեց, որ ժողովրդի, երկրի առաջ ծառացած խնդիրները լուծելու համար պետք է համագործակցեն, քննարկումներ անեն եւ իշխանությունները պատրաստ են դրան:
Անդրադառնալով Նիկոլ Փաշինյանի՝ Սերժ Սարգսյանի հրաժարականի հարցը բարձրացնելու նախաձեռնությանը միանալուն, ԲՀԿ-ական պատգամավորն ասաց հետեւյալը. «Պատկերացրեք դուք շենք եք կառուցում, ունեք ծրագիր, ճարտարապետները, դիզայները հավաքվել են, ձեր ծրագիրը իրականացնում են, հանկարծ առաջարկում են նոր փոփոխություն կատարել կառուցվածքի մեջ: Մենք վստահ ենք, որ կառուցողական ենք, մենք չենք գնում ընդդեմի, մենք գնում ենք հանունի: Մենք ի˚նչ անենք, մեր ծրագիրը փոխե˚նք ընթացքից»,-ասաց պատգամավորը՝ վստահեցնելով, որ իրենք հստակ, կառուցողական գնում ենք իրենց ծրագրով, կարող են լինել որակական շեղումներ, բայց ոչ արմատական: