Ֆրանսիացի ֆերմերները ոչխարներին բերել են Փարիզ՝ ի նշան բողոքի գայլերի վերաբերյալ կառավարության քաղաքականության դեմ:
Ֆերմերները հավաքվել են Ֆրանսիայի մայրաքաղաքի կենտրոնում եւ պահանջում են արդյունավետ ծրագիր մշակել՝ ընտանի կենդանիների վրա գայլերի հարձակման դեմ պայքարի միջոցները խստացնելու համար:
Ըստ AFP-ի, նրանց հետ միասին Էյֆելյան աշտարակի մոտ հավաքվել են նաեւ գայլերի պաշտպանության համար պայքարող ակտիվիստները:
Ցուցարարները հանդիպելու են Ֆրանսիայի գյուղատնտեսության նախարար Ստեֆան Լա Ֆոլի հետ: Գործակալության փոխանցմամբ, սպասվում է, որ նրանք հանդիպման են գնալու ոչխարների հետ:
Պաշտոնական տվյալների համաձայն, Ֆրանսիայում 300 գայլեր գտնվում են պետության պաշտպանության ներքո: Վերջին տվյալներով, ընտանի կենդանիների, հիմնականում՝ ոչխարների վրա գայլերի շուրջ 4800 հարձակման դեպք է արձանագրվել:
