Ճանապարհային ոստիկանության 2-րդ սպայական գումարտակի տեսուչ, ոստիկանության կապիտան Տիգրան Գրիգորյանը ծառայութունն Ալավերդիում ավարտելուց հետո տուն էր վերադառնում, երբ տեսավ, որ ճանապարհին վրացական բեռնատար էր շրջվել եւ խցանում առաջացրել: Այս մասին NEWS.am-ի թղթակցի հետ զրույցում պատմեց Ճանապարհային ոստիկանության 2-րդ սպայական գումարտակի հրամանատր Սուրեն Խուդոյանը:
«Ինքը Ալավերդիում է ծառայում, ժամը 16.00-ին ավարտում է աշխատանքը, գալիս է տուն, ճանապարհին տեսնում է որ վրացական բեռնատարը թեքվել, խցանում է առաջացել, կանգնում է, փորձում երթեւեկությունը բացել, մոբիլիզացնում է ամեն ինչ, տրակտոր է բերում, բեռնատարը քաշում են, ճամփան բացվում է: Սկսում է կարգավորել երթեւեկությունը, մեքենաների հոսքը: Մի երկու-երեք մեքենա իրար են հարվածում, սղալով գալիս խփում են այդ տղային»,-պատմեց Սուրեն Խուդոյանը:
Նրան անմիջապես տեղափոխում են Սպիտակի հիվանդանոց, պարզվում է, որ ոտքը 4-5 տեղից կոտրվել է: Մեծ դժվարությամբ հաջողվում է ոստիկանին հասցնել Երեւան, ճանապարհին ցավազրկող դեղամիջոց են ներարկում, բայց ոստիկանի շաքարը բարձրանում է:
ՃՈ-ի պետը տեղեկացրեց, որ նրան տեղափոխել են «Էրեբունի» բժշկական կենտրոն, որտեղ ոտքից ծանրություն են կախել, 4-5 օր պետք է անշարժ մնա, որպեսզի հետո վիրահատեն:Սուրեն Խուդոյանն ասաց, որ կարեւորը ոստիկանի կյանքին վտանգ չի սպառնում, երկար բուժում պետք է անցնի, իսկ 2 օրից էլ նրա դստեր հարսանիքն է, որին չի կարողանա մասնակցել: Նա հայտնեց, որ Տիգրան Գրիգորյանը անընդհատ կրկնում էր, թե ինչպես կարող էր համազգեստը հագին, թողնել եւ հեռանալ, երբ ճանապարհին մեծ խցանում կար:
ՃՈ-ի պետը հավելեց, որ հանրապետությունում այս պահին փակ ճանապարհներ չկան, իսկ ձմեռային եղանակին վթարները պայմանավորված են ձմեռային անվադողեր չօգտագործելու հանգամանքով, երեկոյան ժամերին ճանապարհներին գոյացող սառույցով, ինչպես նաեւ այն հանգամանքով, որ վարորդները զգույշ չեն երթեւեկում, բոլորը շտապում են:
Ավելի վաղ NEWS.am-ը հայտնել էր, որ ձյան առատ տեղումների հետեւանքով արտակարգ իրավիճակ է ստեղծվել Լոռու մարզում: NEWS.am-ի թղթակիցը հաղորդում է, որ փակվել են Սպիտակի ոլորանները եւ Վանաձոր-Ալավերդի ճանապարհի մի հատվածը: Ճանապարհի 10-րդ կիլոմետրում խցանում է առաջացել բեռնատարների պատճառով, որոնք չեն կարողանում տեղաշարժվել՝ փակելով մարդատար մեքենաների ճանապարհը: Խցանումը բացելու աշխատանքներ կատարելիս՝ ճանապարհային ոստիկանության աշխատակցի ոտքը կոտրվել է: Նա տեղափոխվել է հիվանդանոց:
