Թուրքիայում մարդկության դեմ կատարված հանցագործությունների ճանաչման մասին օրինագիծը կմերժվի խորհրդարանում, սակայն կմնա երկրի քաղաքական կյանքի օրակարգում: Այդ մասին այսօր՝ նոյեմբերի 28-ին, մամուլի ասուլիսի ժամանակ հայտարարեց թուրքագետ Հակոբ Չաքրյանը:
Նրա խոսքով՝ 1990-ական թթ. «ցեղասպանություն» բառի միայն բարձրաձայնման համար Թուրքիայում դատում եւ կալանավորում էին: «Օրինագծի հայտնվելն ինքնին ոչ այնքան Ռեջեփ Թաիփ Էրդողանի արժանիքն է, որքան Եվրամիության, այսինքն Էրդողանի հանդուրժողականությունը պայմանավորված է ԵՄ-ի պահանջներով: Սա լուրջ քայլ է. երկրի ներսում օրինականացվում է պատմության հետ երես առ երես կանգնելու պահանջը», - նշեց Հակոբ Չաքրյանը: Թուրքագետը չի կարծում, որ օրինագիծը կընդգրկվի Թուրքիայի Ազգային ժողովի օրակարգում, սակայն դրա ի հայտ գալը համարում է առաջընթաց քայլ:
Հիշեցնենք, որ քրդական Դեմոկրատական կուսակցությունից պատգամավոր Սեբաայթ Թունջելը խորհրդարանում ներկայացրել է Թուրքիայում իրագործված զանգվածային սպանությունների ճանաչման մասին օրինագիծը: Այն նաեւ պահանջում է ներողություն խնդրել ջարդերի ենթարկված ժողովուրդներից:
