«Նախախորհրդարանի» անդամ-աջակիցների 7 վնասված մեքենաները ստուգվել են թե ոստիկանների, թե արտակարգ իրավիճակների նախարարության մասնագետների կողմից: Այս մասին NEWS.am-ի թղթակցի հետ զրույցում ասաց «Նախախորհրդարանի» անդամ, կինոռեժիսոր Տիգրան Խզմալյանը:
«Սա իրականում կրկես է, մենք շատ լավ գիտենք գործի բնույթը, գրեթե բոլոր դեպքերում ոստիկանությունը եւ ԱԻՆ-ը զանգեր են ստացել մի քիչ առաջ կամ հետո, կազմվել է սխեմա, որ մեքենաները չայրվեն ամբողջությամբ, սա նախազգուշական քայլ է, ու եթե չսկսվենք, լինելու է մյուս քայլը: Եթե ոստիկանության եւ ԱԱԾ-ի քթի տակ նման անմիջական գործողություն է կատարվում այսպես համակարգված, ուրեմն հենց այդ կառույցներն են կանգնած դրա ետեւում»,-ասաց նա:
Կինոռեժիսորը պատահական չի համարում, որ դեպքից առաջ ոստիկանապետը իր ռուս գործընկերների հետ հանդիպմանը հայտնել է, թե Ներքին գործերի նախարարության հիմնական թշնամիներն են քրեական տարրերը եւ քաղաքական ընդդիմությունը: «Դա ուղիղ պարզ ինքնախոստովանություն է, թե ում են իրականում ընդդիմություն համարում, երեւաց նրանից, թե ում մեքենան են այրում»,-ասաց նա:
«Նախախորհրդարանում» որեւէ հույս չեն կապում, թե մեքենաների վնասման դեպքերով նորմալ քննություն կլինի, նրանք միայն իրենց հետ են հույսեր կապում: Թեեւ տարածքում տեսախցիկներ կան, Տիգրան Խզմալյանը կասկածում է՝ տեսագրությունները կտրամադրվեն, թե ոչ:
«Կարո Եղնուկյանի դեպքում փորձեցին այրել ոչ թե ետեւի անիվը, այլ դեմից, մնացածների մոտ նույն ձեռագիրն է, լցրել են յուղ կամ կերոսին, այրել, որոշ դեպքերում փայտի կտորներ են դրել, որ հրդեհը ավելի ավելի ուժգին լինի: Որոշ մեքենաներ անպիտան վիճակում են, մի քանիսի դեպքում հասցրել են շուտ հանգցնել, տերն է նկատել, պատահակլան անցորդներ կամ այլ մեքենայի վարորդներ»,-ասաց կինոռեժիսորը:
Հիշեցնենք, որ նոյեմբերի 26-ի գիշերը անհայտ մարդիկ վնասել էին «Նախախորհրդարանի» անդամներից եւ աջակիցներից 7-ի ավտոմեքենաները: Երեւան քաղաքի քննչական վարչության Շենգավիթի քննչական բաժնում հարուցվել է քրեական գործ`«Նախախորհրդարան» շարժման անդամ Ս.Մելքոնյանի ավտոմեքենան դիտավորությամբ, հրկիզման եղանակով այրելու դեպքի առթիվ:
