Կաշառք վերցնելու մեջ մեղադրվող՝ Նոր Նորքի զինկոմ Ռաֆայել Զախարյանն իրեն մեղավոր չի ճանաչում, իսկ առաջադրված մեղադրանքն էլ անհիմն է: Այս մասին NEWS.am-ի հետ զրույցում ասաց ամբաստանյալի փաստաբան Արմեն Խաչատրյանը:
«Նոյեմբերի 28-ին Ավան եւ Նոր Նորք վարչական շրջանների ընդհանուր իրավասության դատարանում սկսվել է գործով դատավարությունը: Առաջին օրը հարցաքննվել են վկաները, այդ թվում Գագիկ Վարդանյանը, որն ըստ մեղադրանքի՝ գումար է տվել Ռաֆայել Զախարյանին: Չեմ հերքի՝ գումար իսկապես եղել է, բայց թե ինչ պայմաններում է տրվել, ինչ նպատակով, ով է պահանջել, ինչի է պահանջել, ինչքան է պահանջել: Այս հարցերը դեռ պատասխան չունեն»,- ասաց փաստաբանը:
Հաջորդ դատական նիստ նշանակվել է դեկտեմբերի 17-ին:
Նշենք, որ ըստ մեղադրական եզրակացության՝ Ռաֆայել Զախարյանը 2014թ. մարտի 17-ին իր աշխատասենյակում, Երեւան քաղաքի Ավան 7 փող. 45 տան բնակիչ Գագիկ Վարդանյանից, որդու՝ Ալբերտ Վարդանյանի օգտին առողջական վիճակի բերումով պահեստազորում հաշվառելու, դրանով իսկ զինվորական ծառայության զորակոչից վերջնականապես ազատելու դիմաց պահանջել է առանձնապես խոշոր չափերով՝ 1.659.840 ՀՀ դրամին համարժեք 4000 ԱՄՆ դոլար կաշառք: Երկու օր անց Զախարյանը նույն զինկոմիսարիատի զորակոչային բաժանմունքի պետի աշխատասենյակում Գ.Վարդանյանից ստացել է 3900 ԱՄՆ դոլար:
Ռաֆայել Զախարյանին մեղադրանք է առաջադրվել Քրեական օրենսգրքի 311-րդ հոդվածի 4-րդ մասի 2-րդ կետով եւ 235-րդ հոդվածի 1-ին մասով: Առաջինը նախատեսում է ազատազրկում՝ 5-10 տարի ժամկետով` գույքի բռնագրավմամբ կամ առանց դրա: Երկրորդը պատժվում է կալանքով՝ առավելագույնը երեք ամիս ժամկետով, կամ ազատազրկմամբ՝ առավելագույնը երեք տարի ժամկետով: Նա կալանավորված է:
Հիշեցնենք, որ կալանավորված Նոր-Նորքի զինվորական կոմիսար, գնդապետ Ռաֆայել Ռուբենի Զախարյանը ոստիկանության ներքին զորքերի նախկին հրամանատար Գարիկ Գաբրիելյանի՝ Գելի հորաքրոջ որդին է: