Այս օրերին ռեժիմն աննախադեպ հարձակումներ է գործում «100-ամյակը առանց ռեժիմի» շարժման վրա: Այդ մասին ասվում է շարժման տարածած հաղորդագրության մեջ:
«Նոյեմբերի 26-ին եւ 27-ին հրկիզվել են Շարժման ծրագրերի մասին իրազեկող ավտոերթերին մասնակցած Հիմնադիր խորհրդարանի թեկնածուների եւ Շարժման աջակիցների ավտոմեքենաները, իսկ նոյեմբերի 27-ի երեկոյան՝ ժամը 18:00-ի սահմաններում, մահափորձ է կատարվել Հիմնադիր խորհրդարանի պատգամավորության թեկնածու Գեւորգ Սաֆարյանի նկատմամբ՝ նրան գլխի շրջանում մարմնական վնասվածք պատճառելու միջոցով: Բարեբախտաբար՝ Գեւորգ Սաֆարյանի կյանքին այս պահին վտանգ չի սպառնում:
Ուժային մեթոդներով Շարժումը ճնշելու գործելակերպին անցնելը միանգամայն հասկանալի եւ բացատրելի է: Ռեժիմը նախկինում կարողանում էր տեղեկատվական շրջափակման միջոցով ժողովրդին հեռու պահել Շարժման ծրագրից եւ գաղափարներից ու դրա շնորհիվ մոլորեցնել նրան, մինչդեռ ավտոերթերի միջոցով մեզ արդեն հաջողվում է ճեղքել տեղեկատվական պատնեշը:
Այդ պատճառով ռեժիմը ստիպված եղավ դիմել իրեն բնորոշ քրեական բնույթի
ուժային գործողությունների: Առաջին ավտոերթից հետո ոստիկանները բռնություն կիրառեցին զինյալ ազատագրական պայքարի ժամանակ տեսողությունը եւ մի ձեռքը կորցրած, նախկինում ԱՍԱԼԱ-ի գաղափարախոսական թեւի պատասխանատու, ներկայումս՝ Նախախորհրդարանի քարտուղարության եւ Արդարության ատյանի անդամ Ալեք Ենիգոմշյանի նկատմամբ, որից հետո նրան թողեցին փողոցի բանուկ մասում՝ կյանքի համար վտանգավոր իրավիճակում:
Այդ քայլը Շարժման մասնակիցներին հղված յուրօրինակ ուղերձ էր, որ եթե Ալեք Ենիգոմշյանի նման վաստակ եւ հեղինակություն ունեցող մարդու հետ կարող են այդպես վարվել, ապա մյուսները ոչնչով ապահովագրված չեն:
Իսկ երբ պարզ դարձավ, որ այդ քայլն ազդեցություն չգործեց, ռեժիմը դիմեց Շարժման մասնակիցների ավտոմեքենաները հրկիզելու եւ նրանց նկատմամբ արդեն կյանքին սպառնացող ֆիզիկական բռնություն գործադրելու գործողությունների:
«100-ամյակը առանց ռեժիմի» շարժումն այս օրերին բազմիցս նշել է եւ մեկ անգամ եւս հիշեցնում է, որ մարտահրավերն ընդունված է: Շարժումը շարունակելու է իրազեկման ավտոերթերը եւ ժողովրդին համախմբելու քայլերը: Հաջորդ ավտոերթը տեղի կունենա դեկտեմբերի 7-ին՝ Ապարանի ենթաշրջանում, իսկ դեկտեմբերի 20-ին ավտոերթը ուղեւորվելու է Արցախ:
Միեւնույն ժամանակ՝ Շարժումը, այդ թվում՝ իրազեկման ավտոերթերը, արդյունավետ կերպով շարունակելու համար անհրաժեշտ է անձնական եւ նյութական մասնակցություն, համախմբում եւ փոխօգնություն: Այս գործոնն ապահովելու նպատակով «Իրավունք եւ աջակցություն» հիմնադրամը նախաձեռնել է դրամահավաք՝ ռեժիմի ոտնձգություններից տուժածներին անհրաժեշտ նյութական աջակցություն ցուցաբերելու համար: Ուստի մեր հայրենակիցներին կոչ ենք անում օժանդակել այդ հիմնադրամին:
«100-ամյակը առանց ռեժիմի» շարժումը հայտնում է իր հաստատակամությունը, որ Մեծ Եղեռնի 100-ամյակի օրը՝ 2015 թ. ապրիլի 24-ին, ոտքի է հանելու մեր ժողովրդին եւ նրա կամքի պարտադրման գործողություններով հեռացնելու է սպիտակ եղեռն իրականացնող ռեժիմին»:
