«Ժառանգություն» խմբակցության պատգամավոր Զարուհի Փոստանջյանի հայտարարությունը Հ1 հեռուստաընկերության «Խորհրդարանական շաբաթ» հաղորդման շրջանակում:

«Սիրելի հայրենակիցներ,  խորհրդարանական երեք խմբակցությունների համագործակցության արդյունքում  ձեզ այդպես էլ  չներկայացվեց  ամբողջական իշխանափոխության միասնական գործողությունների առաջարկ եւ իրականացման ժամանակացույց:

Քաղաքական վիճահարույց ընթացքը անհրաժեշտություն է առաջացրել խմբագրելու  մեր պայքարի  քաղաքական  մարտավարության,  ռազմավարության, համագործակցության եւ դիմադրական էներգիայի հզորացման հարցերը։

Միասնական հրապարակի առջեւ քաղաքական գործիչների գործողությունները չեն կարող սահմանափակվել անհատական կամ կուսակցական տեսակետների հիման վրա հայտարարություններով: Ներկայիս անհրաժեշտ հրամայականն է՝ ստույգ ժամանակացույցով բողոքի, դիմադրության եւ ընդվզման գործողությունների  նախաձեռնումը:

Հետեւաբար՝ միացյալ օրակարգը եւ միացյալ առաջնորդությունը ձեւավորելու նպատակով  Րաֆֆի Հովհաննիսյանը նախաձեռնում է հրապարակային հանդիպումներ.

2014 թվականի դեկտեմբերի 5-ին, ժամը 17:00-ին` Երեւանի Ազատության հրապարակում, դեկտեմբերի 6-ին, ժամը 13:00-ին` Վանաձորի Արցախ պուրակում, եւ նույն օրը, ժամը 17:00-ին` Գյումրիի Վարդան Աճեմյանի անվան թատերական հրապարակում: Այդ հանդիպումների օրակարգում են լինելու նաեւ ԴԻՄԱԴՐԱԿԱՆ ԷՆԵՐԳԻԱՅԻ ՀԶՈՐԱՑՄԱՆ  գործիքների կիրառման ձեւերի եւ իրագործման քննարկումները: Ուրեմն, սիրելի հայրենակիցներ, հանդիպում ենք՝ 2014 թվականի դեկտեմբերի 5-ին, ժամը 17:00-ին` Երեւանի Ազատության հրապարակում, դեկտեմբերի 6-ին, ժամը 13:00-ին` Վանաձորի Արցախ պուրակում, եւ նույն օրը, ժամը 17:00-ին` Գյումրիի Վարդան Աճեմյանի անվան թատերական հրապարակում:

Միջոցները բազմաթիվ են եւ իրագործելի են մեր կամքով՝ բողոքի համատարած ցույցեր, գործադուլներ, նստացույցեր, իշխանության հարկային տեռորի դեմ անհնազանդություն, Սերժ Սարգսյանի ու նրա խմբի անդամների նկատմամբ  «Հայ ժողովրդի դատարանի» կողմից հանրային դատավարության անցկացում եւ այլն:

Ժամն է հեռացնել խավարի իշխանությունը եւ վերացնել մեզանում իշխումը խավարի»,- նշել է Փոստանջյանը։