Հայաստանի ԱԺ արտաքին հարաբերությունների մշտական հանձնաժողովի հերթական նիստում, այսօր՝ նոյեմբերի 28-ին, երկրորդ ընթերցմամբ քննարկվել է «Ժառանգություն» խմբակցության օրինագիծը, որով առաջարկվում է կարգազանց համարել այն պատգամավորը, ով նիստի ընթացքում գրանցվում կամ քվեարկում է բացակա պատգամավորի փոխարեն:
Հիմնական զեկուցող «Ժառանգություն» խմբակցության պատգամավոր Զարուհի Փոստանջյանն առաջարկել է օրենքը համալրել նոր դրույթով,ըստ որի՝ կարգազանց է համարվում այն պատգամավորը, ով նիստի ընթացքում գրանցվում կամ քվեարկում է բացակա պատգամավորի փոխարեն, իր գործողություններով խոչընդոտում է պատգամավորին՝ անարգել օգտվելու քվեարկության համար օրենքով սահմանված հնարավորություններից, աղմկում է, վիրավորական արտահայտություններ է հնչեցնում, չի կատարում ԱԺ նիստը վարողի` սույն օրենքից բխող պահանջները կամ կատարում է սույն օրենքով սահմանված կարգը խախտող այլ գործողություններ:
Նա նշել է, որ ավելացրել է եւս մեկ կետ, համաձայն որի՝ կարգազանց են համարվում պատգամավորներից բացի ԱԺ նիստում ներկա այն անձինք, ովքեր նիստի ընթացքում աղմկում են, վիրավորական արտահայտություններ են անում, չեն կատարում ԱԺ նիստը վարողի` սույն օրենքից բխող պահանջները կամ կատարում են սույն օրենքով սահմանված կարգը խախտող այլ գործողություններ:
Նախագիծը դրական եզրակացությամբ ընդգրկվել է առաջիկա քառօրյա նիստերի օրակարգերի նախագծերում: