Երկաթուղային տրանսպորտի ոլորտը պատրաստ է ԵՏՄ անդամակցությանը: Այս մասին նշվել է ՀՀ տրանսպորտի եւ կապի նախարարությունում տեղի ունեցած քննարկման ժամանակ, որը նվիրված էր ԵՏՄ անդամակցության արդյունքում երկաթուղային տրանսպորտով ուղեւորափոխադրումների եւ բեռնափոխադրումների բնագավառում նախատեսվող իրավական փոփոխություններին:
Նախարարության մամուլի ծառայությունից հայտնում են, որ քննարկմանը մասնակցում էին ՀՀ տրանսպորտի եւ կապի նախարարի առաջին տեղակալ Արթուր Առաքելյանը, երկաթուղու վարչության պետ Արսեն Մկրտչյանը, «Հարավկովկասյան երկաթուղի» ՓԲԸ գլխավոր տնօրենի տեղակալ Օլեգ Շակալովը, ոլորտի այլ պատասխանատուներ։
Մի շարք փաստաթղթերի շուրջ տեղի ունեցավ ակտիվ քննարկում։ Կողմերը նշեցին, որ երկաթուղային տրանսպորտով ուղեւորափոխադրումների եւ բեռնափոխադրումների բնագավառում չկա որեւէ խոչնդոտ, որը կարող է ազդեցություն ունենալ Հայաստանի Եվրասիական տնտեսական միությանը անդամակցելու գործընթացների վրա։
Նշվեց նաեւ, որ նախարարությունը պատրաստակամ է երկաթուղային տրանսպորտով ուղեւորափոխադրումներ եւ բեռնափոխադրումներ իրականացնող ընկերություններին տրամադրել անհրաժեշտ խորհրդատվություն եւ օժանդակում։