Չինական հեռուստատեսային եւ ռադիոհաղորդումներում արգելել են չարաշահել բառախաղային արտահայտությունները, հաղորդում է Gazeta.ru-ն՝ վկայակոչելով Չինաստանի տպագրության, ռադիո, կինո եւ հեռուստատեսության պետական վարչությունը:
Գերատեսչության տվյալներով, լեզվական կատակները վնասում են լեզվի մշակութային ժառանգությանը եւ կարող են շփոթեցնել հեռուստադիտողներին ու ռադիոլսողներին, հատկապես երեխաներին:
Փաստաթղթի հեղինակների կարծիքով՝ չինարենի արտահայտչաբանությունների չափից ավելի օգտագործումը կարող է ավարտվել «մշակութային եւ լեզվական քաոսով»:
«Ռադիոյում եւ հեռուստատեսությունում պատասխանատու դեմքերը պետք է խստացնեն կանոնները եւ արգելեն չինարենի անկարգ եւ ոչ պատշաճ օգտագործումը, հատկապես արտահայտչաբանությունների չարաշահումը»,-ասված է Չինաստանի իշխանությունների հաղորդագրությունում:
Փաստաթղթի համաձայն՝ այսուհետեւ հաղորդումների ժամանակ պետք է օգտագործել միայն ստանդարտ չինարեն եւ թույլ չտալ գրավոր ու բանավոր խոսքի երկակի ընկալում: